Fernández Mier mira'l mundu rural al traviés de l'arqueoloxía

La historiadora participa nes charres mensuales d'Ástura de cultura asturiana.

'El futuru d'un pasáu: El mundu rural a traviés de l'arqueoloxía' ye'l nome de la conferencia que va poner Margarita Fernández Mier esta tarde, dende les 19.30 hores, nel Atenéu Obreru de Xixón (Cuadonga, 7). La profesora d'Historia Medieval na Universidá d'Uviéu va esplicar cómo un paisaxe munches vegaes consideráu 'natural' ye, por embargu, una construcción social que tien un doble componente: la tresformación por aciu de l’arramplu de los sos recursos, y la ellaboración d’un conxuntu de significaos que camuden a lo llargo’l tiempu y que tresformen el paisaxe nun espaciu privilexáu pal estudiu históricu de forma complexa.

L’estudiu del paisaxe dende la historia y l’arqueoloxía fadrá visibles grupos sociales que xeneralmente nun tuvieron percuriaos: pon nel centru l’análisis a les persones de l’aldea y la so capacidá y determín a lo llargo’l tiempu na xeneración y caltenimientu d’un patrimoniu que tien que ser valoráu dafechu nes actuales polítiques del territoriu. Nos caberos años l’equipu de Fernández Mier entamó un proyeutu arqueolóxicu sobre’l paisaxe rural, tomando como modelu de trabayu dos aldees asturianes con estremada trayeutoria histórica y asitiamientu xeográficu como son Vigaña Arcéu (Miranda) y Villanueva (Santu Adrianu).

Dambes apurrieron-y una importante información arqueolóxica que da valor históricu al nuestru paisaxe.