Fernández Llera y Sánchez Vicente lleven a Xixón el llibru de rellatos sobre la preautonomía

|
Roberto Fernández Llera presentación 'Relatos de la Preautonomía' nel RIDEA

El RIDEA editó esta obra que nació de les xornaes entamaes con motivu del cuarentenu aniversariu del 'Consejo Regional de Asturias'.

Roberto Fernández Llera ye'l coordinador de 'Relatos de la preautonomía: en torno al 40 aniversario del Consejo Regional'. El mesmu recueye les conclusiones del ciclu de conferencies celebraes pola institución nel 2018 al respeuto de la efeméride, ente les que rescampló l'alderique ente los ex presidentes Juan Luis Rodríguez Vigil, Antonio Trevín y Vicente Álvarez Areces.

Amás de la trescripción de dichu alcuentru, el llector tamién va atopar testos de Xuan Xosé Sánchez Vicente, Leopoldo Tolivar Alas y Manuel Hernández Muñiz, sobre cultura, la cuestión xurídica y la económica, de manera respeutiva. Tres celebrar la presentación el mes pasáu n'Uviéu, na sede del Real Instituto de Estudios Asturianos (RIDEA), y dar a conocer el llibru n'Avilés, agora ye'l turnu de Xixón.

L'actu va ser el miércoles, a les 19.30 hores na sala de conferencies del Centru de Cultura Antiguu Institutu, y nella van intervenir Fernández Llera y Sánchez Vicente.

Na imaxe, Fernández Llera, en primer planu, na presentación del llibru nel RIDEA, acompañáu na mesa pol presidente de la institución Ramón Rodríguez Álvarez; el presidente d'Asturies, Adrián Barbón; y el presidente de la Xunta Xeneral, Marcelino Marcos. Semeya propiedá del RIDEA.

Contador Estadistiques