Fernández Conde lleva una victoria doble nel IV Cuenca del Nalón

El cantante cántabru de tonada ganó en categoría absoluta y na d'homenaxe a El Presi.

El vienres celebróse na Casa Cultura de La Pola Llaviana la segunda final del IV Concursu de Canción Asturiana Cuenca del Nalón, entamáu por A Mansalva. Álvaro Fernández Conde convirtióse nel gran trunfador de la competición al llevar la victoria tanto na categoría absoluta como na entamada n'homenaxe a El Presi.

Na principal, tres l'intérprete de Lamasón clasificáronse Carlos Velasco y Belén Arboleya, que tamién van a actuar el vienres na gala d'entrega de premios (19.30 hores, Casa Cultura de La Pola con entrada a 3 euros), cita na que confirmada la presencia del cantante Vicente Díaz, Pilar González na amuesa infantil y monologuista El Maestru. Isaac Sierra, Cristina Sánchez, José García, Manuel Roza, Sergio Menéndez, Manuel Arenas, Maribel González, Ricardo Balmori y Manuel Pendás ocuparon les places que van dende'l cuartu puestu al decimosegundu.