Fernández nun consigue sacar compromisos concretos a Rajoy

El presidente d’Asturies aconceyó col estatal esti xueves en La Moncloa. Javier Fernández treslladó a Mariano Rajoy los problemes del país, pero nun consiguió sacar compromisos concretos al líder conservador.

Nuna comparecencia ante la prensa tres la reunión, l’asturianu esplicó qu’aprovechó esta cita, la primera con Rajoy dende que tomara les riendes del Gobiernu, pa comenta-y les sos "discrepancies profundes" cola política del PP nel tema de la minería y abordar tamién les novedaes no que respeuta a la tarifa llétrica y les infraestructures pendientes n’Asturies. Sobre’l conflicu mineru, el presidente del país reiteró a Rajoy la so oposición a la postura del Gobiernu que dirixe y, anque reconoció que "nun esperaba una desautorización" del ministru d’Industria, José Manuel Soria, aseguró que "el presidente tomó nota". Fernández insistió en calificar de "equivocada" la posición del Executivo estatal y aseguró que les sos consecuencies van tener un coste social y económicu eleváu.

El secretariu xeneral de la FSA-PSOE tamién defendió la necesidá de zarrar l’asuntu de la tarifa llétrica pa evitar una desllocalización d’empreses asitiaes n’Asturies. Según destacó, Rajoy mostróse "mui sensible" a esti asuntu y garantizó-y que’l Gobiernu ta trabayando nél pa que los precios permitan el desarrollu del sector empresarial. Ante esta situación, alvirtió de que’l Gobiernu asturianu va tar "sollerte" a esti asuntu, yá que los plazos finen a últimos d’esti añu y, pa entós, les empreses "tienen que tener esa seguridá".

Por último, trataron el tema de les infraestructures previstes n’Asturies, centrándose sobre manera na Autovía del Cantábricu (A-8) y la variante de Payares. Fernández aceptó’l calendariu anunciáu pola ministra de Fomentu, Ana Pastor, que marca que les obres tarán terminaes nel 2013 y 2014, de forma respeutiva, y reclamó fondos pa l’autovía a La Espina y los accesos al puertu d’El Musel, yá que son dos "elementos neurálxicos" pal desarrollu del país.