Javier Fernández, candidatu ganador de les eleiciones, contautó esti llunes con Jesús Iglesias pa concertar una reunión pal miércoles pela mañana. Tres conocer el resultáu del votu emigrante va falar col restu de líderes.
 
En rueda de prensa na sede de la FSA-PSOE, apuntó qu’IX ye la primer formación cola que contautó tanto por "afinidá" como por compartir tarees de gobiernu, al tiempu que remarcó que ye "fundamental" que s’acelere el procesu, "non por ansiedá, sinón por necesidá", pa qu’Asturies tenga cuanto antes un gobiernu estable. Entrugáu pola posibilidá de presentase a la investidura anque los resultaos se mantengan depués del miércoles, cuando va facese’l recuentu del votu emigrante, Fernández afirmó que se fai "cargu" de la responsabilidá que supón el mandatu ciudadano pa que’l PSOE "busque" liderar l’Executivu asturianu.
 
Sicasí, reconoz que l’escañu que permanez en xuegu ye "mui importante", yá que pue reforzar la mayoría del PSOE y daría protagonismu al diputáu d’UPyD. Respeuto a esta formación, y ante les declaraciones d’Iglesias señalándola como de "dereches", Fernández nun quixo opinar y señaló que tien la "obligación" de buscar la gobernabilidá d’Asturies ensin "poner etiquetes ideolóxiques a nenguna fuercia política".
 
Sobre l’escenariu que se dibuxaría si’l votu emigrante mantién el resultáu actual y Foro de Ciudadanos y PP pauten, Fernández dulda de la estabilidá qu’esi alcuerdu pudiera da-y al país al considerar que nestos meses últimos y con una una suma mayor de diputaos nun foron quien a entendese.