Fernández Casanueva retira la so candidatura a secretariu xeneral de Podemos Xixón pa xunise a la de Somos Asturies de Xandru Fernández

Les candidatures a secretariu xeneral y al Conseyu Ciudadanu en Podemos Xixón queden reducíes a trés. Orlando Fernández Casanueva anunció que retiraba la de so pa sumase a la de Somos Asturies, encabezada por Xandru Fernández, na presentación del proyeutu organizativu que tuvo llugar el sábadu. Un día enantes diose a conocer la de Xixón Sí Puede, liderada por Mario Suárez del Fueyo.

“Apéome de la carrera a la secretaría xeneral de Podemos porque creo que los proyeutos fuertes constrúinse por collaboración, en común, y cola confluencia de les bones idees. Y tamién m’apeo porque, y dígolo con total franqueza y ensin posturéu, Xandru Fernández ye ún de los meyores candidatos posibles a la secretaría xeneral nel círculu de Xixón. Ye una de les mentes más pernidies de Podemos n’Asturies y amosólo con muncha xenerosidá a lo llargo d’esti procesu de construcción de programes políticos y organizativos”, aseguró Fernández Casanueva énte les cerca de 130 persones qu’enllenaron na mañana del sábadu’l salón d’actos del Centru de Cultura Antiguu Institutu. Darréu intervino Fernández, qu’afirmó que “nun va tar en nenguna llista a la candidatura a l’Alcaldía de Xixón”.

El candidatu a secretariu xeneral de Podemos nel conceyu, dientro del proyeutu organizativu de Somos Asturies, llamentó qu’en Xixón “la xente camina mirando pal suelu porque nesta ciudad perdímoslo casi too: el sector naval, la industria, hasta les ganes… Nós nun tamos equí pa dar recetes; nun somos naide porque lo somos too. Podemos ha de ser la interfaz, la ferramienta pa que la xente de Xixón participe y tome la política”, apuntó, pa depués denunciar la situación del país: “Hai unos individuos amparaos nunes estructures de partíu que lleven años decidiendo’l futuru d’Asturies non pol informe de la mayoría, sinón pol de la minoría», aseguró usando como referencia l’argumentu del filme de Steven Spielberg ‘Minority report’.

La llista de Somos Asturies en Xixón liderada pol escritor y filósofu pal Conseyu Ciudadano ta formada anguaño por catorce persones: Fernández Casanueva, Nuria Rodríguez López, Paula Pastor, María José Fernández Hevia, Santi Fano, Carlos Palomares, Víctor Luis Álvarez Martínez, Antón Caamaño, Rafael Posada, Guillermo Díaz Martínez, Delfina López Rodríguez, Sofía Castañón y Francisco Estévez. “El Conseyu Ciudadanu tará formáu por 24 persones, pero nun presentamos 24 candidatos porque queremos que los 10 restantes sían persones que nun van nesta candidatura o independientes, precisamente pa garantizar que’l Conseyu Ciudadanu sía la representación plural de toles sensibilidaes y tolos puntos de vista de Podemos en Xixón”, esplicó Fernández.

Les otres dos propuestes

Un día enantes, nel Hotel León, dábase a conocer de forma pública la candidatura Xixón Sí Puede, encabezada por Suárez del Fueyo, que nel actu convidó “a tolos ciudadanos a sumase a partir de mañana a esta revolución pacífica que pondrá les instituciones al serviciu de la xente”. La llista presentada, “na que la ciudadanía ta representada por un conxuntu de ciudadanos plural, paritariu y integrador, firmemente convencíu de que Xixón tiene nes sos manen tomar las riendas del so destín”, ta formada por 21 persones: María José González Suárez, Candido González Carnero, Estefanía Puente, Omar Tuero, Virginia Torres, David Alonso Medina, Mariti Pereira, Alejandro Zapico, Lorena Argüelles, Juan Miguel Piedehierro, Verónica Mejías, Juan Miguel Chaves, Alba Rodríguez Martínez, Aitor Hevia, Alejandra Lobo, José María Amigó, Amelia Sara Benedicta Odriosolo, José María González Mena, Ana María Veiga, Fernando Silva y Luis Álvarez Menéndez.

Nel actu tamién intervino González Suárez, qu’apuntó que los principales puntos del programa de Xixón Sí Puede ye “reconstruyir el texíu social y industrial, desendolcar un urbanismu al serviciu de la xente y non de los especuladores, y recuperar la política cultural”. Otra manera, la tercer candidatura, la d’Humberto Escandón, entovía nun presentó la so llista pal Conseyu Ciudadanu. La votación pa estos cargos en Podemos Xixón y en tolos conceyos va tener llugar del 26 al 30 d’esti mes.