Fernández Alonso gana’l XXII Premio Xeira de Narracióis Curtias en gallego-asturiano

El XXII Premio Xeria de Narracióis Curtias en gallego-asturiano foi pa Laura Fernández Alonso. La escritora de La Espina ganó’l concursu lliterariu decanu de los que s’entamen na llingua del occidente del país col rellatu ‘Úa tarde circo’.

Los escritores Manuel García Galano, María José Fraga Suárez, José Manuel Martínez Castro y Rafael Cascudo Noceda formaron el xuráu qu’escoyó la obra de Fernández Alonso, nacida nel 1986 y diplomada n’Enfermería y Fisioterapia pola Universidá d’Uviéu, como ganadora. Esta moza, pese a nun tener una producción lliteraria bayurosa, trátase d’una persona mui venceyada a la música y la cultura asturiana. Asina, ye l’autora de la lletra ‘Mar’ de Los Gatos del Fornu y tien collaborao con espublizaciones como Fnast. Nel añu 2010 participó nel primer cursu básicu de gallego-asturiano entamáu pola Asociación Xuvenil Trafego y na edición pasada del concursu de Xeira yá recibiera una mención especial del xuráu pol so rellatu ‘A cama coxa’.

Fernández Alonso, que sucede al naviego Alberto Castro Gión nel palmarés del premiu, recibe una recompensa económica de 600 euros pol gallardón. L’Asociación Cultural Xeira tuvo esti añu una subvención de 675 euros de la Conseyería d’Educación, Cultura y Deporte pa la dotación del premiu, organización y cartelería tres los recortes importantes que l’Alministración implantó a la promoción del asturianu y gallego-asturiano.