Fernández afirma qu’Álvarez-Cascos “ta incubando una fuercia política d’ultraderecha” a nivel estatal

Javier Fernández, candidatu de FSA-PSOE a la presidencia d’Asturies, cargó contra Francisco Álvarez-Cascos, cabezaleru de Foro Asturias Ciudadano (FAC), ayeri nun mitín n’Avilés ante más de 2.000 persones. El sucesor de Vicente Álvarez Cascos aseguró que l’ex ministru de Fomentu col PP “ta incubando una fuercia política d’ultraderecha” con pretensiones de carauter estatal.
 
“Na otra derecha tenemos un candidatu que reside en Madrid, veranea en Santander y quería venir colos cuadros baxo’l brazu per Navidá a Asturies pa montar una operación política apoyada por Esperanza Aguirre y segar la yerba debaxo de Mariano Rajoy . Eso ye lo que quería facer. Por eso Rajoy nun lo quixo, porque xugábase’l pescuezu con él. Por eso nun lo quixo. Teneilo claro. Teneilo claro: esti ciudadano ta equí n’Asturies incubando’l güevu de la culiebra”, señaló Fernández a los presentes en clara referencia a Álvarez-Cascos. Nesti actu eleutoral, el llíder de la FSA-PSOE taba acompañáu por Alfredo Pérez Rubalcaba, vicepresidente del Gobiernu estatal, y por Pilar Varela, alcaldesa d’Avilés y candidata a la reeleición.
 
Fernández tamién tuvo pallabres pal PP, en concreto pa la so candidata, Isabel Pérez-Espinosa, y pal alcalde d’Uviéu, Gabino de Lorenzo. El ‘socialista’ recordó que foi De Lorenzo quien situó como cabeza de llista a Pérez-Espinosa y qu’él ye quien la mueve “con mandu a distancia”. D’igual forma, criticó l’endeudamientu d’Uviéu y que la candidata ‘popular’ declarase hai tiempu que’l Niemeyer yera “un pelotazu urbanísticu”.
 
Pela so parte, Pérez Rubalcaba tuvo pallabres p’Álvarez Areces –“tu y yo sabemos que nun vas xubilate– y destacó a Fernández como’l meyor candidatu a la presidencia d’Asturies. Na so intervención tamién ironizó col “centrismu y rexonalismu” de FAC y señaló, en tonu bromista, que “acabarán siendo nacionalistes”.