Femetal y MCA-UXT firmen el conveniu del metal ensin l’apoyu de Comisiones Obreres

Esti miércoles, tres más de diez meses de negociaciones, Femetal y MCA-UXT firmaron el conveniu del metal pal 2011 y el 2012. Comisiones Obreres (CC OO) nun apoya esti alcuerdu al nun tar conforme col apartáu salarial del mesmu.
 
El Conveniu Coleutivu de la Industria del Metal d’Asturies, que pasa a ser válidu de forma inmediata, recueye incrementos salariales en tolos conceptos retributivos del 1,5 por cientu pal 2011 y del 2 por cientu pal 2012, con cláusula de revisión salarial en dambos periodos. Según informaron les dos partes, tamién inclúi un cambiu de consideración de ‘Conveniu Provincial’ a ‘Conveniu Autonómicu’, lo que garantiza la prevalencia d’esti conveniu sobre los d’empresa.
 
Amás, incorpora la creación d’una Comisión Mesta pa regular la figura nueva del aprendiz nel sector, qu’amás comenzará a trabayar dafechu. Tamién recueye un alcuerdu pa mantener la regulación actual de les hores de disposición llibre, dexando ensin efeutu lo establecío na reforma llaboral última y establez la obligación de les empreses de comunicar de forma previa a los representantes de los trabayadores les condiciones sociollaborales nos desplazamientos al estranxeru de los emplegaos. Por últimos, dexa pa prau’l tope de 8 meses que marca la reforma llaboral como tiempu máximu pa negociar el conveniu próximu y inclúi l’aplicación automática de lo acordao na negociación estatal no que respeuta a la estructura de la negociación coleutiva y en materies reservaes.
 
Dende la Federación del Metal, Construcciones y Afines (MCA) d’UXT valoraron l’alcuerdu robláu, yça qu’entienden que "nun sólo garantiza’l poder adquisitivu de los trabayadores, sinón qu’amás supón una apuesta pol mantenimientu y el futuru del sector". Ye importante recordar que la negociación ente patronal y sindicatos llevó a les centrales a convocar una fuelga de dos díes nel mes de xunu que provocó’l parón total del sector al tar apoyada por la mayoría de los más de 20.000 emplegaos de les 1.250 empreses del metal.