Felpeyu y Dixebra actúen en Valles pa l’Asociación Pepe Bocanegra

Los Alcuentros de Músicas Feches n’Asturies, entamaos pola Asociación Pepe Bocanegra, lleven a Valles, nel conceyu de Piloña, a Felpeyu y a Dixebra. Los primeros actúen el vienres, mentes que la banda avilesina toca’l sábadu.
 
Tres la participación nesti certame, que cumple la so tercer edición, de P’Amusquis, Tuenda y LAP (Lisardo, Ablanedo y Pepín de Muñalén), esti añu l’Asociación Musico-Cultural Pepe Bocanegra convida a dos formaciones históriques de la música asturiana que sumen 46 años de vida ente dambes. El vienres el turnu ye pa Felpeyu, mentes que’l sábadu Dixebra va ser la encargada de llevar la so música a los socios del coleutivu y visitantes. Les dos actuaciones van grabase en videu y audio, y difundise per Internet.
 
La hora d’entamu de los dos conciertos ta prevista pa les 23 hores y la entrada ye de baldre pa socios y simbólica de 5 euros pa les persones que se desplacen hasta Piloña a disfrutar del eventu. Hai que destacar que, por causes d’aforo, ye previsible’l llenu nes dos actuaciones. Les puertes van abrise a les 21 hores.