Felpeyu toca n'Uviéu esti llunes

L'asociación cultural carbayona Tribuna Ciudadana presentó esti xueves un ciclu de conciertos dedicáu al folk. Esta entidá yá entamó n'años anteriores esti ciclu dedicándolu a otros estilos como'l jazz o'l flamencu. Esta vegada van ser trés los conciertos, xuntando a grupos representantes de lo meyor que se ta faciendo en música folk n'actualidá. Amás, xunta col ciclu de conciertos tamién se presentó'l llibru "Folk, música con raíces" escritu por Cristina López Cordero.

La música va empezar a sonar esti mesmu llunes cola actuación de los asturianos Felpeyu. L'actuación va ser nel Auditoriu Principe Felipe de la capital del Principáu a les 20:00 hores, la entrada ye de baldre, anque hai que retirar una entrada que ta a disposición de tol públicu que quiera dir nes taquilles del Teatru Campoamor y nes del Auditoriu'l llunes del conciertu. Felpeyu, amás de los temes del so discu YÁ! y otros de discos anteriores, tamién va presentar dalgún cantar nuevu del que tendría que ser un discu nuevu qu'inda nun tien feches pa la so ellaboración.

Pal mes d'abril, concretamente'l xueves 27, ye'l siguiente conciertu cola actuación de los castellanos La Musgaña. Esti grupu ye un verdaderu veteranu con seyes discos dende l'añu 1988, y referente per toa España de la música folk. El ciclu fina col conciertu, yá pal mes de xunu, d'Eileen Ivers, vigulinera estadounidense con dos discos en bolsu y qu'actua acompañada d'una banda que promete una interesante nueche na que'l vigulín d'Eileen mez la música irlandesa cola música popular americana.

Nel actu d'esti xueves tamién s'aprovechó pa presentar el llibru llibru "Folk, música con raíces", escritu por Cristina López Cordero y prologáu pol escritor Inaciu Llope. Nelli faise un repasu de l'orixe y evolución de la música folk n'Asturies y de que manera llegó calistrar na sociedá asturiana. Esti llibru, espublizáu pola propia asociación Tribuna Ciudadana, ye frutu de parte del trabayu fechu por Cristina López cuando ellaboró la so tesina de musicoloxía, dedicada a la música folk.