Felpeyu protagoniza esti xueves una folixa nel xixonés Café Trisquel

El Café Trisquel retoma esti xueves los conciertos cola actuación de Felpeyu. L’históricu grupu de folk asturianu va protagonizar una folixa “monumental” que va dar entamu a les 22 hores nesti establecimientu xixonés.

Con 20 años de vida al llombu, Felpeyu ye una referencia na escena folk asturiana y ún de les bandes más internacionales del país tres percorrer 14 países de cuatro continentes. Dos décades de reellaboración de la música tradicional asturiana “nuna llinia paralela a les tendencies que se dan anguaño nel folk européu”, según espliquen ellos mesmos na so páxina web, que dexen un bon puñáu de cantares perprestosos que tienen orixe nel cancioneru popular.

El conciertu de Felpeyu nun ye l’actividá única prevista nel xixonés Café Trisquel pa los xueves del mes de febreru, yá que’l día 9 va actuar Belén Costa y Lluis Núñes, ‘El Mordisco’, formación de versiones soul y música discotequera de los 70; y el día 16 va tener llugar la presentación de les creaciones últimes de los poetes asturianos David González (‘No hay tiempo para libros’) y Ana Vega (‘La edad de los lagartos’).