Felpeyu prepara trabayu nuevu

Depués el so últimu trabayu editáu n'Asturies nel añu 1997, "Tierra", y del discu en direutu editáu n'Australia "Live Overseas", los xixoneses tan rematando esti mes la grabación d'un nuevu discu. La banda, que yá se convertiere va tiempu nuna de les más importantes y influyentes del folk asturianu, ta grabando los temes del so nuevu discu nos estudios Sinergia de Madrid. Ye esta una grabación que'l grupu lleva preparando muncho tiempu, y los Felpeyu consideren que ye un discu más maduru no que cinca a la calidá téunica qu'ellos mesmos son capaces d'aportar y nes igües de los cantares, anque caltenien el mesmu estilu de siempres. Pa ello la producción del discu tan llevándola los propios miembros del grupu y nun va haber collaboraciones d'instrumentistes de fuera.La instrumentación siguirá siendo la mesma que nel discu anterior, nun siendo pola mayor presencia de la flauta travesera, que toca'l nuevu miembru del grupu, el gaiteru y flauteru Diego Pangua. Ente les pieces hai temes tradicionales y compuestos, anque paez tendrán mayor presencia les composiciones de miembros del grupu, magar que como ellos dicen, basaos en patrones tradicionales. Boni Perez aporta a esti discu les lletres pa un par de temes, mientres que les otres tres pieces cantaes del discu repártense ente dos temes escritos por ellos mesmos y otru tradicional.Anque a Felpeyu tamos fechos a velos namás qu'enriba d'un escenariu, dende equí queremos ufiertavos la oportunidá de velos d'una manera diferente. Equí podéis ver el comic qu'apaeció nel caberu anuariu de la música asturiana publicáu pola discográfica L'Aguañaz, nel que nos dan una visión enforma cómica de la que foi la so segunda xira pela Australia de los canguros. El comic dibuxolu'l percusionista del grupu, Ruma Barbero.

Contador Estadistiques