Felpeyu gana’l VII Distintivu Fini Suárez a la investigación nel folclor asturianu

L'Alcalde de Mieres, Luis María García, la Conceyala de Festeyos y Turismu, Isabel Sánchez, y el Xuráu del VII Distintivu Fini Suárez, d'investigación etnográfica y folclórica n'Asturies, dieron a conocer güei llunes 16 d'abril el fallu d'esti premiu que fai alcordanza de la desapaecida folklorista mierense. El grupu folk Felpeyu, formación que l'añu pasáu perdiere a dos de los sos miembros, Igor Medio y Carlos Redondo nun accidente de circulación, ye'l ganador d'esti significativu reconocimientu.

El premiu, que reconoz la "trayectoria nel rescate, espardimientu y promoción de la Cultura de la nuestra Tierra" y el papel de Felpeyu como "exemplu nel trabayu pola recuperación del Folk Asturianu y la difusión internacional dientro de les músiques del Arcu Atlánticu" inxértase nos actos de la "Folixa na Primavera" que va entamar el próximu vienres 20 d'abril col pregón tradicional nel parque Xovellanos, a cargu de la escritora Mari Luz Pontón, y la entrega oficial del premiu a Felpeyu.