Felpeyu fai la maleta

Los Xixoneses Felpeyu van tar esti mes de xunu cola maleta a recostines,
yá que los sos próximos conciertos van llevalos a llugares tan
allonxaos como Copenhague o Beirut. Ello ye que la selmana qu¹entra van
facer una xira per Dinamarca y Suecia del 2 al 10 de xunu. Nel norte d'Europa
van visitar ciudaes como Småland y Växjö en Suecia y Copenhague,
Tonder o Assensen en Dinamarca. Ellí van tocar en diferentes festivales
como'l Halkær Kro Festival 2005,
Bruunske Pakhus, Tobaksgaarden,
Hagges Muzik Pub o'l
Ballerup Festival
2005.



Dempués de volver d'Escandinavia
Felpeyu nun va tener tiempu casi nin pa
desfacer les maletes, ya que'l día 21 tiene que tocar en Beirut,
Líbano, de manera que'l continente d'Asia va agospiar per primer vegada
un conciertu de los asturianos. El grupu va facer una xira pel Líbanu
del 17 al 23, tamién de Xunu, onde rescampla'l conciertu que van facer
en Beirut el 21 nel día mundial de la música d'esta
ciudá.



Felpeyu puen considerase'l grupu folk más viaxeru de la
música asturiana. A Norteamérica, Australia y dellos países
europeos como Italia, Polonia, Bélxica, Holanda, Francia y Portugal,
viéronlos enriba del escenariu nos sos 14 años de vida musical. Ya
más cerca, nel estáu español, el grupu xixonés
tamién tien el so públicu, y van actuar en
Mendebala, Euskadi, el 1 de
Xunetu y Canovelles, Catalunya, el 21 de Xunetu. Viendo estes feches hai que
da-y en parte la razón al grupu cuando afirma que "ye casi
más fácil venos fuera d'Asturies". Con too y con ello'l
grupu yá tien zarraos dellos conciertos n'Asturies como'l que van dar el 24 de xunu en
Nava, al día siguiente en Pola Llaviana y la so primer actuación
nel Festival Intercélticu
d'Avilés el 23 de xunetu.