Felpeyu asoleya'l tema 'Saltones Expósitos'

|
Felpeyu 'Saltónes Expósitos'

Trátase d'una composición que quedó fuera de 'Cerquina', el so trabayu últimu.

Lisardo Prieto, integrante de Felpeyu, aprovechó esti tiempu de reclusión por cuenta la pandemia de COVID-19, "pa caciplar en discos duros ignotos, y claro, aparecen coses", apunta la banda. Ún de los 'descubrimientos' ye un amiestu de saltones 'Saltón das cuadernas del Fornello' (Lisardo Prieto) / 'Xiringüelu de xipla' (tradicional) / 'Saltón d’En Ca Lisardo Lombardía' (Diego Pangua)– que la formación folk trabayó pa 'Cerquina' (2017) y que finalmente nun entró nel discu "porque nun nos convencía del too".

La pista nun llevó nome y quedó, como se diría en castellanu, 'expósita'. Felpeyu agora recupérala y faila pública baxo'l nome de 'Saltones Expósitos', faciendo asina un homenaxe a Xuan Nel Expósito, históricu acordioneru de la banda.

"Préstanos sacar esti tema agora porque permítenos escuchar una vez más a Elías García al buzuki", apunta la banda, que recuerda que precisamente'l músicu que nos dexó'l pasáu añu "nun vía esti tema claru del too". "Trátase d'una composición de Lisardo empatada con un xiringüelu de xipla del suroccidente'l país y una composición de Diego que ye mayormente una adaptación de les frases típiques de cruces y de pasu jota nos saltones del centru", espliquen.

Contador Estadistiques