Fanjul va sustituyir a Ana Coto na Xunta Xeneral

La diputada de Ciudadanos dimitió tres nun acatar los mandaos de Madrid sobre los presupuestos de Barbón. Cristóbal De la Coba, siguiente na llista, refugó l'acta.

Luis Carlos Fanjul, economista avilesín de 50 años, va sustituyir a la independiente Ana Coto como parllamentaria na Xunta Xeneral. Ocupaba'l puestu 9 de la candidatura de la formación naranxa, qu'algamó 5 escaños nes eleiciones.

"Prestaríame aplicar los mios conocimientos de l'alministración pública para rellanzar les oportunidaes d'Asturies", aseguró ayeri tres confirmar la so disposición de recoyer l'acta a Sergio García Rodríguez, secretariu d'Organización. Enantes, el médicu De la Coba, númberu 8, refugara l'escañu, alegando tar enfotáu na so carrera profesional.

Esta situación dase tres la dimisión de Coto, númberu 2, depués d'astenese na votación de los presupuestos pa favorecer la so aprobación mientres los sos compañeros, por mandáu de la xestora de Ciudadanos, camudaren el votu alcordáu tres negociar cola FSA col oxetivu de torgar les cuentes socialistes. El so sustitutu, Fanjul, ye funcionariu públicu, adscritu a la Sindicatura de Cuentes como ayudante d'auditoríes del sector públicu autonómicu dende l'ámbitu del control financieru, del cumplimientu de la llegalidá, asina como d'eficacia y economía.

Dimisión d'Irún

El responsable de programes de Ciudadanos n'Asturies, Pedro Irún comunicó a los afiliaos del partíu per carta la so decisión de dimitir. La razón ta tamién na intromisión de la xestora pa camudar el votu del grupu parllamentariu sobre los presupuestos.