Fanjul va facer una revisión crítica de los castros asturianos na charra mensual d’Ástura nel Atenéu Obreru

20 Mayu, 2014 por Pablo R. Guardado

Inicie sesión o rexístrese pa espublizar comentarios

L’arqueólogu Alfonso Fanjul Peraza va protagonizar esti martes la charra mensual d’Ástura nel Atenéu Obreru de Xixón. Col nome de ‘Ástures y arqueoloxía castreña: una revisión crítica', l’espertu da una definición nueva de lo que foron los castros.

Asina, va repasar toles revisiones feches hasta'l momentu al mapa arqueolóxicu de los poblaos fortificaos asturianos. “L'estudiu individualizáu de 500 xacimientos arqueolóxicos amuesa, xunto a los avances de los nuevos afayos, una nueva definición del ‘castru’ nel norte peninsular, que nun ye más una aldega, sinon un auténticu centru de poder nuna sociedá xerarquizada abondo más desendolcada y enguedeyada de lo que les fontes clásiques y la historiografía oficial quixeron facenos creyer, mentanto que la cultura material amuesa grupos bien adautaos, arteros y áxiles nes sos rellaciones colos pueblos vecinos. La realidá arqueolóxica pon fin al mitu académicu de les comunidaes autosuficientes que se quier emponer sobro los pueblos celtes del norte”, espliquen dende Ástura.

Fanjul, llicenciáu n'Historia pola Universidá d'Uviéu, Gráu de Prehistoria de la Universidá de Salamanca col trabayu ‘Aproximación al poblamiento castreño en el valle del Trubia (Asturias)’ y doctorandu n'Arqueoloxía pola Universidá Autónoma de Madrid, va ufrir al públicu presente –que con casi toda seguridá va tornar a dexar pequeñu’l salón d’actos del Atenéu Obreru de Xixón (cai Cuadonga, 7)– una charra que se presenta perinteresante. Ésta va principiar a les 19.30 hores, con entrada llibre.