Familiares y amigos de Fernando G.R. siguen coles concentraciones

La plataforma d'amigos y familiares de fernando G.R, acusáu de delitos de terrorismu rellacionaos cola colocación d'artefactos esplosivos en delles sedes de partíos políticos n'Asturies y que la selmana pasada salió en llibertá provisional baxo fianza de la cárcele de Segovia, sigue reivindicando que se llevante'l secretu de sumariu.

Pa ello, la plataforma convoca pa güei xueves 29 d'avientu una concentración de protesta, que s'alvierte que ta autorizada, énte la sede del PSOE n'Uviéu a les 19:30h. Según la plataforma convocante, trátase con ello de protestar polo que-yos abulta un "montaxe de la Delegación del Gobiernu empobináu a criminalizar los movimientos sociales y del que Fernando G.R. foi cabeza de turcu". La plataforma reclama tamién que se llevante'l secretu de sumariu sobre'l casu pa saber de qué s'acusa exactamente al procesáu y quier denunciar la "inhumana" llei antiterrorista que se-y aplicó al acusáu Fernando G.R. que pasó selmanes enteres en situación d'incomunicación dafechu dientro de la prisión.