“Falemos a nosa fala”, encamentó Sanjurjo na llectura institucional pola Selmana de les Lletres Asturianes

Escolines y escolinos de los colexos uvieínos Fozaneldi y Carmen Ruiz Tilve participaron esti martes na llectura institucional pola XL Selmana de les Lletres Asturianes. Miembros de la Mesa de la Cámara, diputaos, representantes del Gobiernu y del mundu de la cultura lleeron poemes n’asturianu y gallego-asturiano.

Al llau de del presidente de la Xunta Xeneral, Pedro Sanjurjo, qu’emplegó’l gallego-asturiano, la so llingua materna, sentáronse na Mesa de la Cámara los escolares Chad Derdabi, del Carmen Ruíz Tilve, y Sergio Rodríguez Menéndez, del Fozaneldi, acompañaos pol conseyeru d’Educación y Cultura, Genaro Alonso, y la vicepresidenta de l’Academia de la Llingua Asturiana, Marta Mori. El d’Abres apuntó que la manera “más importante” de defender una llingua ye utilizándola “esnsin necesidá de forciar situación nenguna d’imposición u obligatoriedá”.

“L’usu de les llingües garantízase cuando se fala y hai que falales con naturalidá”, dixo tres indicar que les llingües han de ser vehículos de “comunicación y entendimientu, y nunca obstáculos”. Nel actu recitó dos xuegos populares de cuna de tradición oral que conoció nel so llar, al abrir ‘Mansurriña, mansurriña’con Sergio, pa pesllar y ‘Dedín, dedín’, con Chad, despidiéndose de los presentes encamentándo-yos que “falemos a nosa fala”.

Ensin presencia del PP

Pelayo Nieda, del Carmen Ruiz Tilve, lleó ‘Asturies patria querida’, testu de creación propia, y Iratxe Prado, del mesmo centu, el so escritu ‘La música asturiana nel deprendizax de la llingua nel colexu’. Por parte del Fozaneldi, Lorena Jaume dio llectura a ‘Alendando’, lletra del cantar homónimu escritu por Roberto González-Quevedo, mientres que so compañeru Pablo Fernández Borzas recitó ‘Andolina’, redautáu por Lisardo Lombardía.

Testos de Pablo Texón, Lourdes Álvarez, Vanessa Gutiérrez, Ángeles Carbajal, Raquel F. Menéndez, Sofía Castañón, Berta Piñán, Mánfer de la Llera o de la propia Mori foron lleíos polos presentes. Los participantes foron Pilar Valera, conseyera de Servicios y Derechos Sociales; María Josefa Miranda (IX); Fernando Padilla, direutor xeneral de Planificación Llingüística y Normalización; Rosa María Espiño (Podemos); Almudena Cueto, direutora xeneral del Institutu Asturianu de la Muyer y Política de Mocedá; Nuria Devesa (FSA); María del Carmen Fernández Gómez (Foro); Concha Masa (IX); Carmen Eva Pérez Ordieres (FSA); Diana María Sánchez Martín (Ciudadanos); Begoña Serrano, direutora xeneral d’Emigración y Cooperación al Desarrollu; María Cristina Valdés, direutora xeneral d’Universidaes y Investigación; Ovidio Zapico (IX); Vicente Hoyos, secretariu xeneral téunicu de la conseyería d’Educación y Cultura; y Juan Antonio García Fernández, xefe del Serviciu de Planificación Llingüística y Normalización.

El PP foi l’únicu partíu que nun tuvo representación nesti actu.