#FalamosIgual, campaña conxunta pa concienciar de la unidá llingüística del asturlleonés

Iniciativa pol Asturianu y Faceira tán acabantes de poner en marcha la campaña conxunta #FalamosIgual cola fin de llegar a ciudadanos d’Asturies y Lleón, asina como d’otros territorios del dominiu asturlleonés. L’oxetivu de la mesma ye concienciar a la población de la unidá llingüística del idioma.

“La campaña quier poner en valir esi patrimoniu llingüísticu común desplicando a la sociedá cómo les distintas variedaes del asturllionés (asturianu, n’Asturies, y llionés en Llión) son perfectamente intelixibles ente si, compartiendo gran parte del léxicu y una mesma gramática, asina como una hestoria común”, apunten dambos coleutivos sobre una campaña enfocada principalmente pa les redes sociales. Tanto Iniciativa pol Asturianu como Faceira van dir espublizando cartelos con una ilustración sobre pallabres comunes mui emplegaes pola población de dambos llaos del cordal, como ‘afalagar’, ‘afuracar’, ‘butiellu’ o ‘prestar’, ente otres.

#FalamosIgual tamién pretende reconocer les variedaes internes de la llingua como un elementu positivu “que nun contradiz la unidá del mesmu, sinón que ye una riqueza. Asina, falar de llionés o asturianu ye falar de la mesma realidá llingüística con nomes distintos y con rasgos propios, como asocede con toles llingües del mundu, que tán conformaes por distintes variedaes”, espliquen.

El llamáu a les instituciones ye otru de los oxetivos de la campaña, “pa que trabayen de forma conxunta en reforciar los llazos culturales y lingüísticos d’Asturies, Llión y el restu de territorios que comparten llingua, con campañes propies, eventos y apoyu recíprocu a iniciatives culturales, nel ámbitu musical, lliterariu, o de la cultura tradicional”.