‘Fálame’ va llevar les cámares de TPA a colexos pa que los escolinos s'espresen n’asturianu

|

La primer temporada de ‘Fálame’ va consistir en 26 visites a centros educativos del país pa que los escolinos y escolines s’espresen en llingua asturiana o gallego-asturiano. Pese a que’l conseyu d’alministración de RTPA tenía avisu del estrenu d’esti programa infantil pal domingu, la so primer emisión va retrasase finalmente.

Médula Producciones, responsable de ‘Fálame’, ta nestos momentos grabando los episodios previstos nesta primer entrega, que se van poder ver en TPA a partir de mayu, según preve’l so xerente Carlos Navarro, qu’afirma que la direición del ente nun punxo fecha llende d’entrega de los primeros programes. De momento, yá se finó cola grabación de cinco de los 26 capítulos y en dos selmanes van tar pa emitise, anque s’espera un periodu de promoción previu per parte de la canal.

L’oxetivu del programa, de 30 minutos de llargor, ye’l de divulgar conocimientos llingüísticos d’asturianu, “pero nun va ser una clase de llingua asturiana”, apunta Navarro. “Va tener un componente teóricu, con un apunte de gramática y otru de vocabulariu, pero lo que se busca ye que los escolinos s’espresen na so llingua patrimonial”, afirma’l responsable de Médula Producciones.

Asina, baxo la supervisión de los sos maestros y maestres, van tomar la pallabra pa falar sobre dellos temes propuestos y cosadielles, asina como pa cantar. La música ye, precisamente, otru de los pegoyos de ‘Fálame’, con interpretaciones de cantares en direutu de Pop Piquiñín, grupu d’ésitu ente la reciella.

“En principio va ser una temporada, pero nos prestaría que s’allargara más”, apunta Navarro, que recuerda que Médula foi la empresa que s’encargó de ‘Presta asgaya’, hasta la fecha única programación infantil realizada dafechu pa TPA, de la que s’emitieron 300 capítulos tanto en castellanu como n’asturianu nos primeros años de TPA. Sicasí, nos últimos tiempos los espacios pa los más pequeños de la casa foron nulos, quitando la esperiencia de la serie gallega doblada al asturianu 'Los Bolechas', de la que s'emitieron dos temporaes.

Entovía ensin horariu confirmáu, la emisión de 'Fálame' va producise na mañana de los domingos, mientres que'l sábadu siguiente va repetise l'episodiu de la selmana anterior.

Contador Estadistiques