La Facultá de Formación del Profesoráu torna a acoyer una xornada sobre llingua y educación

|

La xornada ‘Llingua Asturiana y Eduación’ repite na Facultá de Formación del Profesoráu y Eduación de la Universidá d’Uviéu tres la celebrada en marzu d'esti mesmu añu. L’activida va desendolcase’l xueves a lo llargo del tol día con más d’una decena de ponencies.

Esta iniciativa vivió la so primer edición el 25 de marzu, baxo la denominación I Xornada ‘La Llingua Asturiana nel Sistema Educativu d’Asturies’, tres una demanda vieya de la Delegación d’Alumnos y Alumnes Grupu 36 d'una mayor visibilización del idioma na facultá. Raúl Carbajal encargóse de coordinar toles actividaes naquella ocasión y agora repite cola II Xornada ‘Llingua Asturiana y Educación’ col sofitu de Juan Carlos San Pedro y Xosé Antón González Riaño. Éstes tán destinaes al profesoráu del sistema educativu asturianu, anque l’asistencia ye abierta y de baldre pa tola ciudadanía.

Según espresa la organización na páxina de la xornada, los sos oxetivos son reflexonar sobre la importancia de la llingua asturiana nel contestu educativu, na importancia de la tresmisión oral de los conocimientos de los asturianos y de las asturianes asturfalantes y la so trescendencia na creación de la identidá coleutiva, na la integración de la llingua asturiana nes nueves Teunoloxíes de la Información, y nes fontes d’ información nueves redautaes dafechu n’asturianu y la so implicación nel campu educativu. D’igual forma, busca dar a conocer, pa depués valorar, el trabayu fechu pol Gobiernu en rellación col idioma, asina como les problemátiques sociales acerda del asturianu dende dellos puntos de vista.

Actividá matutina y vespertina

L’entamu de les actividaes va tener llugar a les 10 hores cola intervención de Julio Antonio González García, vicerreutor de Profesoráu y Ordenación Académica de la Universidá d’Uviéu; Inmaculada González Gómez, primer teniente d'alcalde d’Uviéu; Ana María Fueyo, direutora xeneral de Política Llingüística; San Pedro, decanu de la Facultá de Formación del Profesoráu y Educación; y Carbajal, coordinador académicu de la xornada. Darréu, González Riaño, profesor titular de la Universidá d’Uviéu, va abrir les ponencies con ‘La llingua asturiana y el Proyeutu Llinguística de Centru’ dientru del bloque primeru, de nome ‘Averamientu a la llingua asturiana nel contestu educativu’.

A les 11.35 hores va principiar el segundu bloque, ‘La llingua asturiana y el Principáu d’Asturies’, cola intervención de Fueyo cola charra ‘El Principáu d'Asturies y la llingua asturiana’, pa tomar depués la pallabra José Luis Remis, asesor téunicu docente na Conseyería d'Educación, Cultura y Deporte. Van zarrar la mañana col tercer bloque, ‘La tradición oral asturiana na escuela pública asturiana’, con aniciu previstu pa les 13.15 hores, Xosé Antón Fernández ‘Ambás’ y Ramsés Ilesies cola ponencia ‘Importancia de la música y del bailḷḷe tradicional na Educación Primaria’ y una actuación musical.

L’actividá vespertina va emprimar a les 15.30 hores col cuartu bloque, ‘La importancia de la llingua asturiana na formación de los mayestos y mayestres’, cola ponencia de Jesús García Albá, caderalgu de la Escuela Universitaria de Maxisteriu con docencia na Facultá de Formación del Profesoráu y Educación,  ‘La llingua asturiana nel procesu deprendimientu-aprendidax del Conocimientu Social, Natural y Cultural’, y la presentación del proyeutu ‘Cantar del vasu’ a cargu de los profesores Poli Mencia, Iván Huerga y Pablo Quiroga, toos ellos integraos nel coleutivu Xuncir. L’aniciu del quintu bloque, ‘La llingua asturiana y les nueves teunoloxíes (TIC)’, ta previstu pa les 16.20 hores cola intervención de Xandru Armesto, maestru de Llingua Asturiana na Educación Primaria y collaborador de Softastur, en ‘La presencia de la Llingua Asturiana nel sieglu XXI: rede Internet y telefonía móvil’, pa depués continuar coles de Pablo Rodríguez Medina, llicenciáu en Filoloxía Hispánica y especialista en Filoloxía Asturiana (‘TIC y destreces llingüístiques’) y Vítor Suárez, mayestru d'Educación Primaria (‘La Wikipedia n'asturianu: una propuesta didáutica pa les nueses clases’).

Tres un pinchéu na cafetería de la facultá, a les 18.20 hores va dar comienzu’l sestu y caberu bloque, ‘La llingua asturiana dende la perspeutiva de la reivindicación social y educativa’, qu’inclúi una mesa redonda de nome ‘La llingua asturiana dende la perspeutiva sindical’, y la comunicación ‘La llingua asturiana na mocedá: presente y perspeutives de futuru’ a cargu de la Xunta Estudiantil Asturiana.

L'asistencia a esta xornada va ser debidamente acreditada pola facultá, con una duración de 8,5 hores llectives. Pa ello ye necesario rellenar nesti enllaz el documentu que facilita la organización o al traviés del corréu electrónicu xornadallinguasturianaasturies@gmail.com.

Contador Estadistiques