Éxitu del cursu d’encuestadores

El cursu d'encuestadores qu'entamen la Universidá d'Uviéu y la Oficina de Política Llingüística col oxetivu de formar a filólogos y persones interesaes en xeneral como encuestadores especializaos en dialectoloxía, toponimia y cultura popular rexistró un éxitu col que nun contaben nin los mesmos organizadores, que se vieron obligaos a xubir el númberu de places dende les 35 que taben propuestes hasta les 50.

El filólogu Xulio Viejo, del grupu investigador "Seminariu de Filoloxía Asturiana", ye'l director d'esti cursu y tamién del segundu cursu d'aniciu al asturianu pa periodistes y informadores, pal que sigue abiertu'l plazu de matrícula. No tocante al cursu pa periodistes, neto que se ficiere l'añu pasáu, amás d'esti cursu d'aniciu, Política llingüística y la Universidá d'Uviéu tienen previsto facer un segundu cursu d'afondamientu y especialización en situaciones comunicatives n'asturianu que va tener llugar yá pa los primeros meses del 2006.