Euskadi y Galicia celebren eleiciones

|
Nuñez Feijoo y Urkullu

L'EAJ-PNV y el PP aspiren a siguir gobernando.

Esti domingu vascos y gallegos tán llamaos a les urnes pa escoyer a los sos representanes nos sos parllamentos nacionales. N'Euskadi'l lehendakari Iñigo Urkullu busca la reeleición nunes eleiciones marcaes pola decisión de la Xunta Eleutora de Gipuzkoa de nun permitir participar a Arnaldo Otegi como candidatu por EH Bildu.

Según la encuesta preleutoral del Centru d'Investigaciones Sociolóxiques (CIS), l'EAJ-PNV ganaría les eleiciones con un resultáu asemeyáu al del 2012, con ente 27 y 28 diputaos (27 hai cuatro años), siendo la segunda fuercia EH Bildu con 16 (21). Elkarrekin-Podemos taría mui cerca de la formación abertzale nel so debú nuna cita eleutoral vasca con ente 15 y 16 parllamentarios, mentes que'l PSOE perdería la metá de los sos diputaos pa quedar en 8. Completaría'l parllamentu'l PP, con 8 escaños, dos menos qu'anguaño.

Núñez Feijóo, a pola mayoría absoluta

El PP ganaría en Galicia, según el CIS, con mayoría absoluta al sumar el 44,9 por cientu de los votos. D'esta forma, la izquierda vería frenada la so aspiración d'algamar un cambiu de color na Xunta.

Asina, Alberto Núñez Feijóo repetiría como presidente de Galicia al sumar ente 40 y 41 escaños (41 nel 2012), calteniéndose como segunda fuercia'l PSOE con 16, dos menos que na anterior cita. En Marea quedaría con ente 15 y 17 diputaos (AGE sumara 9), mentes que'l BNG perdería 5 pa quedar con 2. Ciudadanos podría entrar na Xunta con un parllamentariu.

 

Semeyes: 

De European People's Party - EPP Congress Madrid - 21 October, CC BY 2.0, https://commons.wikimedia.org/w/index.php?curid=44806164.

De Irekia - →Esta foi sacada del archivu: Lehendakariak hazkundea eta enplegu-sorrera espero ditu 2015erako.jpg, CC BY 2.0, https://commons.wikimedia.org/w/index.php?curid=37776593

Contador Estadistiques