Europa entero mira pa Barcelona

Cola "euromanifestación" d'esta mañana convocada pola Confederación Europea de Sindicatos baxo'l lema "Por una Europa política y social" y na véspora del cume de ministros europeos, entama un fin de selmana en que Barcelona va tar poco menos que tomada. Pertrechaos por cinco aviones de guerra, una corbeta de l'armada española y 8.500 persones ente policíes de tolos cuerpos, los mandatarios de la Europa de los 15 discutirán sobre dellos temes importantes pal futuru de la UE, ente los que rescamplen l'ampliación de la UE al este y les nueves regles del mercáu enerxéticu, too ello con un enfotu claramente lliberalizador. Les descomanaes midíes de seguridá nun van quitar pa que d'equí al sábadu recorran la ciudá catalana venti manifestacionesnin pa que se celebren foros alternativos entamaos por otres organizaciones como'l Forum Social de Barcelona. L'alcance de la xunta Europea ye tan grande que la Universidá de Barcelona suspenderá estos díes les clases pa entregase a un debate sobre la globalización. Nel especial del portal catalán Vilaweb tienes tola información sobre axenda pa estos díes y links tanto a toles organizaciones que participen nes protestes como a los documentos institucionales.