Eurodiputaos asturianos de PP y PSOE axúntense pa qu’Asturies nun pierda ayudes

Los dos eurodiputaos asturianos na eurocámara, Salvador Garriga del PP y Antonio Masip del PSOE, unviaron ayeri una carta conxunta empobinada a les trés primeres estayes de gobiernu de la UE en demanda de que se caltengan les ayudes estructurales a Asturies na UE ampliada.

El presidente de la Comisión Europea, el portugués José Manuel Durao Barroso, el Presidente del Conseyu Européu, Kart-Heinz Grasser, y el Presidente del Parlamentu Europeo, Josep Borrell, son los trés destinatarios de la carta conxunta en defensa de les ayudes p'Asturies, comunidá que se ve dañada nos sos intereses pol efectu estadísticu que supón la entrada d'estaos nuevos a la UE con rentes más baxes que l'asturiana, colo qu'asturies dexa de ser una de les rexones que se beneficien de los aportes pa la cohexón europea dientro de la categoría "oxetivu 1" de la UE.


La carta de los eurodiputaos únviase la selmana enantes que se negocie l'alcuerdu institucional amestáu a la propuesta financiera en qu'ha definise l'estatus que vayan tener d'agora en p'alantre Asturies, Murcia, Algarve y Basilicata, les cuatro rexones más afectaes pol "efectu estadísticu" una circunstancia que la mesma carta remembra que yá'l mesmu Durao Barroso reconoció que yera "discriminatoria". La esistencia d'una disposición que manda aselar la perda de fondos nes rexones que representen más d'un terciu de la población total de les que sían "oxetivu 1" de la UE nun mesmu estáu, pero non nes nes que sían menos, ye la principal torga pa qu'Asturies acceda a les ayudes, al nun ser Asturies nin con muncho, un terciu de la población "oxetivu 1" del Estáu Español. Los eurodiputaos encamienten que nun se tenga en cuenta esta llende poblacional en cuantes que la comisión executiva tien capacidá d'iniciativa pa facelo y porque amás ello nun diba obligar a que se fixeren cambeos na partida presupuestaria pa cohexón de la UE, que supón el 0,37% del presupuestu comunitariu.


Los eurodiputaos asturianos tienen pa ellos que los grupos de la Cámara van facer casu de la so propuesta, sobremanera dempués de que'l 8 de Xunu la Eurocámara yá votare al favor d'una amestadura a los Fondos Estructurales p'atender a les rexones afectaes pola ampliación. Asturies podría perder alredor de 265 millones d'euros, acordies coles cuentes de los dos diputaos.