ETA anuncia nel ‘Gara’ el cese definitivu de la llucha armada

|

Al traviés d’un comunicáu na web del diariu vascu ‘Gara’, ETA anunció esti xueves el final definitivu de la llucha armada. La banda llama a los gobiernos español y francés a abrir “un diálogu direutu” pa solucionar “les consecuencies del conflictu”.
 
El comunicáu de la banda produzse depués de que'l llunes pasáu se celebrara nel Palaciu d'Aiete de Donosti la Conferencia de Paz na qu'importantes personalidaes internacionales, ente ellos l'ex secretariu xeneral de la ONX, Kofi Annan, reclamaron a la banda “una declaración pública de cese definitivu de l'actividá armada”. Tamién collaboraron na ellaboración del testu l'ex xefe del gabinete de Tony Blair, Jonathan Powell; l'ex primer ministru irlandés, Bertie Ahern; l'ex ministru del Interior francés, Pierre Joxe; la ex primera ministra de Noruega, Gro Harlem Bruntland; y el líder del Sinn Féin, Gerry Adams, y esti miércoles sumáronse al documentu l'ex presidente de los Estaos Xuníos y Premio Nobel de la Paz, Jimmy Carter; l'ex primer ministru británicu Tony Blair; y el presidente de les negociaciones de paz nel norte d'Irlanda, George Mitchell. Nengún representante del gobiernu vascu, español y francés, nin del PP y UPyD, participaron na conferencia.
 
Nel comunicáu, que termina con un “Gora Euskal Herria askatatuta! Gora Euskal Herria aozialista! Jo ta ke independentzia eta sozialismoa lortu arte!”, la banda destaca que “la Conferencia Internacional celebrada recientemente en Euskal Herria ye una iniciativa de gran trescendencia política. La resolución alcordada axunta los ingrediente pa una solución integral del conflictu y tien l’apoyu de sectores amplios de la sociedá vasca y de la comunidá internacional”. Darréu, señala que “tamos énte una oportunidá histórica pa dar una solución xusta y democrática al conflictu políticu. Frente a la violencia y represión, el diálogu y alcuerdu debe prevalecer sobre la imposición. Ési ye’l deséu de la mayoría de la ciudadanía vasca”.
 
ETA reconoz el que’l camín “tampoco será fácil”, pero que “ye tiempu de mirar al futuru con esperanza. Ye tiempu d’actuar con responsabilidá y valentía” y qu’ello ye lo que lleva a la banda a dexar la llucha armada con un compromisu “nidio, firme y definitivu”. Por último, llama a la sociedá vasca “pa que s’implique nesti procesu de soluciones hasta construyir un escenariu de paz y llibertá”.

Contador Estadistiques