ETA amuesa’l so compromisu col final de la confrontación armada

“Permanente”, “xeneral” y “verificable”, son les trés característiques del últimu comunicáu d’ETA. Nél, la organización armada amuesa’l so “compromisu firme col final de la confrontación armada”.

Na mañana d’esti llunes 10, ETA publicó nel diariu Gara l’esperáu comunicáu nel que manifestaron la so decisión de declarar un “altu’l fueu permanente y de carácter xeneral, que pue ser verificáu pola Comunidá Internacional”.

“Esti ye’l compromisu firme d’ETA con un procesu de solución definitivu y col final de la confrontación armada”, recueye’l comunicáu. Nesti sen, destaca l’emplegu del términu “compromisu firme” en cuenta de “muestra de voluntá”, como la organización armada venía usando.

D’esti mou, ETA coincide cola declaración de Bruxeles y Gernika na necesidá de dar “una solución xusta y democrática al conflictu”. Por ello, llamen a desendolcar “un procesu democráticu que tenga la Voluntá del Pueblu Vascu como máxima referencia y el diálogu y la negociación como instrumentos”.

Claves del procesu
Na declaración, ETA marca delles claves pa la solución del conflictu: “resolver les claves de la territorialidá y de l’autodeterminación”, “consensuar ente axentes políticos y sociales vascos la formulación del reconocimientu d’Euskal Herria”, “nengún tipu d’inxerencia nin llende” na decisión de la ciudadanía vasca sobre’l so futuru” y “afitar garantíes y mecanismos necesarios” que respeten la decisión de la ciudadanía vasca.

“Ye tiempu d’actuar con responsabilidá histórica”, indicó la organización armada qu’acabó’l comunicáu sorrayando “l’esfuerzu y llucha por impulsar y afitar el procesu democráticu, hasta algamar una verdadera situación democrática n’Euskal Herria”.