Estudiantes británicos tomen la sede de los ‘tories’ contra los recortes

Una manifestación estudiantil en Londres contra los planes d'austeridá del Gobiernu de David Cameron derivó na ocupación del edificiu sede del Partíu Conservador. La movilización algamó axuntar a 50.000 persones.

La protesta, entamada pol Sindicatu Nacional d'Estudiantes (NUS), convocó alredor de 50.000 persones, lo que significaría la mayor concentración contra'l Gobiernu nos meses d'historia del Executivu de coalición, del que tamién formen parte, amás de los conservadores, el Partido Lliberaldemórata de Nick Clegg.
  
Los mozos quéxense principalmente polos recortes qu'afecten a universidaes y que van obligar a los estudiantes a pagar al añu 6.000 llibres (unos 7.000 euros) por cursar les sos carreres. Esta cifra va elevase en delles universidaes hasta les 9.000 llibres, el triple de la tasa actual, nun contestu marcáu polos intentos del Gobiernu p'amenorgar l'eleváu déficit públicu y que supondríen una reducción del 40 por cientu del presupuestu pa educación superior.
  
Lo que se plantegaba como una manifestación pacífica --dende'l Parlamentu hasta la galería Tate-- xiró al so pasu pel rascacielos onde s'alcuentra la sede de los 'tories', la Torre Milibank. Ellí, y dempués de que dellos mozos rompieren los cristales de la planta baxa, utilizando pa ello hasta'l moblame del propiu edificiu, cientos de manifestantes entraron nes instalaciones.
  
El presidente del NUS, Aaron Porter, mostró'l so desacuerdu col cariz violentu qu'adoptó la protesta, anque se mostró "arguyosu de los 50.000 estudiantes qu'acudieron a manifestase pacíficamente". Nesti sen, culpó de los disturbios a una "pequeña minoría" que quier "causar problemes", informen los medios británicos.