Estrenóse 'Confinaos', una comedia de situación n'asturianu en YouTube

Cada miércoles y domingos va xubise un capítulu nuevu a les 20.30 hores na canal.

El popular videu de Les Fartures ‘#devolvéinosloschigres’, entamáu como chancia tres una conversación de David Castañón, autor del blogue sobre los llugares d’Asturies onde comer y del llibru homónimu, con collacios, foi’l xerme d’un proyeutu mayor. Trátase de ‘Confinaos’, una comedia de situación en YouTube que s’estrenó ayeri y qu’en menos de 24 hores supera les 800 reproducciones.

El primer capítulu lleva’l nome de ‘Si lo diz Spiderman...’ y ta protagonizáu por Nuria Solís (Carmen) y Lluis Nel Estrada (Marcos). El repartu complétenlu Miguel Fernandi ‘Burilo’ (Xicu Xabel), Silvia Quesada (Ana) y Alfredo González (Antón), Nuria Dago (Cayetana ‘Tana’), David Fernández Fernández (Ástur Nel), Xandru Martino (Merche), María Cotiello (Olaya) y el propiu Castañón (Ramiru).

Pablo A. Quiroga y Pablo Casanueva encárguense de la edición d’una serie que tien grabaos 8 capítulos y preparaos 11 guiones. Nacida p’animar el confinamientu de participantes y públicu, nun se descarta da-y continuidá de siguir col ésitu de la estrena.