Estrénase ‘El pisu’, la serie nueva qu'amplía la ufierta de PlayPresta

|
El pisu

Esti llunes a les 21 hores va estrenase ‘El pisu’, una comedia de situación sobre “les aventures y desventures de Marina y Aitor, dos mozos qu’acaben d’emancipase y vense obligaos a convivir nun pisu d’un barriu de Xixón”. Aitor Riera y Marina García formen el repartu d’esta serie de PlayPresta con guión de Marcos S. L.

“La idea xurdió nuna conversación na oficina. Yá tenemos una edá, y na nuesa xeneración tol mundu vivió delles coses compartiendo pisu que pensamos que podía dar pa una serie. Lo guapo ye que nun hai un argumentu fixu, sinón anécdotes esaxeraes a lo absurdo pa que la xente eche unes bones risotaes”, esplica’l guionosta.

Riera apunta que-y presta “el mio personaxe porque ye una caricatura de la mio personalidá: fatu bien, despistáu, amante de la fauna y flora, cómicu, guetador d’ayalgues… Difícil d’aguantar dalgunes vegaes. Prestóme a esgaya”. Marina, mentes, ye la so contraparte ideal: “La Marina de la serie ye una moza algo repunantuca... Bastante más seria que Aitor. El contrapuntu necesariu pa enxamás nun aburrise en ‘El pisu’. Na serie nun lo aguanta, pero na vida real téngo-y ciñu”.

La estrena va ser a les 21 hores nes plataformes de PlayPresta n’Instagram, YouTube y Facebook. Los capítulos siguientes van dir emitiéndose tolos llunes del branu a la mesma hora.

Con esti proyeutu, PlayPresta sigue aumentando los sos conteníos en llinia n’asturianu. ‘El Pisu’ xúnese a la ufiera d’esta canal con cinco años de vida como ‘Viaxando’, ‘Falar d’equí’, ‘La Xanzana’ –otru estrenu braniegu onde vamos esfrutar de covers folk interpretaos por Daniela Cortina– y dalguna emisión en direuto per Twitch.

Contador Estadistiques