Estremadura regula’l maltratu animal nos festexos taurinos

El Conseyu de Gobiernu d'Estremadura aprobó un decretu pa regular los festexos populares taurinos, colos oxetivos de garantizar los derechos de los animales y de mirar pola seguridá de les persones qu'asistan a estes celebraciones.

Según esplicó'l presidente de la Xunta, Guillermo Fernández Vara, esti acuerdu ye frutu de "un ampliu consensu" de los axentes rellacionaos colos festexos, a lo qu'añadió qu'esta normativa va dar pie a que "seya compatible'l caltenimientu d'esta tradición de los festexos taurinos populares cola seguridá pa les persones y cola protección de los animales".
  
Esta regulación va motivar que "s'erradique, de manera frontal, cualquier niciu de maltratu contra" los animales, según sorrayó Fernández Vara, qu'al pregunta-y por si esiste alguna celebración popular na qu'haya maltratu, recordó qu'hasta "fai bien poco tiempu", en poblaciones como Coria "utilizábase unes anfileres" que se clavaben a los llombos del güe, emplegando una cerbatana.
  
Al respecto, añadió que lo que se fai col nuevu decretu ye evitar "formalmente" que fechos como los qu'asocedíen en Coria, y que yá nun asoceden dende hai dos años, nes fiestes de los San Juanes puean "volver existir".

Los festexos autorizaos
En concreto, el Conseyu de Gobiernu aprobó un decretu pente medies de el que s'establez el reglamentu que regula les condiciones de promoción, organización y desarrollu de los festexos taurinos de calter popular que se celebren na Comunidá Autónoma d'Estremadura, que va entrar en vixencia'l día 1 de xineru del 2011.
  
Acordies col reglamentu, los festexos taurinos populares clasifíquense con carácter xeneral en: 'encierros', suelta de reses, becerraess populares y festexos declaraos tradicionales.
  
El reglamentu define los festexos taurinos tradicionales como aquéllos con una celebración enraigonada socialmente que vien realizándose na población de forma siguida dende tiempos inmemoriales, desarrollándose acordies cola costume del llugar.
  
Nesti sen, entiéndese por celebración dende tiempu inmemorial "aquellos festexos nos que s'acredite per cualquier mediu almitíu en derechu que tienen una antigüedá de, polo menos, 100 años".
  
Coles mesmes van poder declarase tradicionales los festexos taurinos populares, declaraos como fiesta d'interés turísticu polos órganos competentes de la Comunidá Autónoma o d'ámbitu territorial superior.

Los festexos prohibidos
El decretu prohíbe los festexos taurinos populares que consistan en "embolar" les defenses de los reses, prendiendo fueu al material o sustancia con que se fai'l "emboláu", los que consistan n'aguantar antorches o elementos asemeyaos nos sos cuernos, o los consistentes n'atar reses a un puntu fixu, con cadenes, cuerdes o de cualquier otra forma llendando'l so movimientu, nun siendo cuando ello seya necesario pa la recoyida d'aquélles con cuenta de dar por acabáu'l festexu.
  
Tamién van quedar prohibíos los que consistan en realizar xuegos cola res que desvirtúen el sen lúdicu taurín del festexu popular, o nos que s'empleguen artiluxos o burladeros que nun seyan populares o tradicionales de la nuesa rexón, o impliquen riesgos pa la integridá de los participantes o les reses que nellos participen.

Seguridá nos festexos
El reglamentu detalla los requisitos qu'en materia de medios técnicu-sanitarios y personal facultativo esíxense pa garantizar una rápida y eficaz asistencia y treslláu urxente a los centros hospitalarios de los firíos que pudiere causar la celebración del espectáculu.
 
Per otru llau, y con carácter xeneral, la edá mínima pa participar nun festexu taurín popular va ser de 18 años, pese a que va permitise la participación de mayores de 16 años en festexos nos que les reses utilizaes seyan machos menores de dos años y/o vaques claramente espuntaos/es de cualquier edá que nun se consideren peligroses.