Estremadura gana col software llibre

La Junta de Extremadura foi la primer institución autonómica del estáu que fizo un apueste seriu pol software llibre n'alministración, desarrollando un sistema operativu propiu de base Linux. LinEx, que ye como se llama la distribución estremeña, ta consiguiendo trespasar les instituciones estremeñes p'asentase tamién n'otros llugares, xenerando un beneficiu pa l'alministración que lu desarrolla en términos de meyorar rellacciones y dase a conocer nos llugares onde esporten el productu. Esti mes, los que desarrollen el proyectu LinEx recibieron visita de UHU-Linux Hungría, que quieren enraigonar el software llibre n'alministración maxar, y tamién tienen tres d'ellos al conceyu de Montevideo, al rexistru de la propiedá de Colombia y a les escueles públiques de Buenos Aires.Va dos selmanes, diose anuncia de que'l Principáu d'Asturies podía seguir l'exemplu estremeñu, pero la cosa nun pasa de momentu d'idega pa la que tampoco nun hai preparáu un estudiu en condiciones, anque nun dexa de valorase la posibilidá, según dixeron fontes del Principáu. Mientres, los conceyos asturianos de Nava y Villaviciosa yá tienen daes de pasu mociones al favor de la inclusión de Linux n'alministración, pero entovía-yos falta concretar plazos y métodos, anque yá tan dándose pequeños pasos alantre gracies a l'asociación Asturlinux, que yá tuvo esplicándo-yos a los funcionarios maliayos lo más básico sobre software llibre