Estrada va falar de productos asturianos na charra mensual d'Ástura

|

La conferencia entitúlase 'Agroalimentación, gastronomía y #MarcaAsturies'.

Ástura quier tratar nesta sesión nueva de les sos charres mensuales de temática asturiana, entamaes en collaboración col Atenéu Obreru de Xixón, sobre "la calidá de los nuesos productos gastronómicos y, en particular, sobre la importancia y l'impautu de la #MarcaAsturies como la meyor espresión de la nuesa propia historia y cultura gastronómiques". Pa ello, l'asociación cultural convida a Lluis Nel Estrada, que va falar sobre "el país de los más de cuarenta quesos, les carnes de races llariegues, les estremaes formes de pescanciar la sidra, la viticultura heroica, la pesca caltenible, l'agricultura de cercanía, la gastronomía tradicional, les nueves tendencies gastronómiques y productives…", que tán diento de lo que se pue denominar la #MarcaAsturies.

"Qué debemos entender por cocina asturiana nel sieglu XXI y cuála ye la nuesa identidá gastronómica" son les entrugues que va responder el cocineru y gastrónomu rioseyanu al traviés d'un "someru percorríu pela nuesa realidá gastronómica procurando analizar el momentu actual de la mesma d’un mou críticu y constructivu". La charra d'Estrada ta prevista a les 20 hores d'esta tarde nel llocal del Atenéu Obreru de Xixón (Cuadonga, 7), con entrada llibre.

 

Contador Estadistiques