Estrénase en Sotrondio la cinta ‘Popeye y les 1001 nueches’

|

El Ciclu de Cine n’Asturianu de Samartín del Rei Aurelio acueye esti xueves l’estrenu de la cinta ‘Popeye y les 1001 nueches’. La proyeición va tener llugar nel Aula Cultural La Plaza, en Sotrondio, a les 19 hores con entrada llibre.
 
‘Popeye y les 1001 nueches’ ye’l trabayu últimu de doblaxe a la nuesa llingua de Gonzali Producciones, empresa que ta poniendu enfotu nesta xera, como aumesen los trabayos anteriores: los llargometraxes ‘La nueche de los muertos vivientes’, ‘Los viaxes de Gulliver’, ‘El tercer home’ y ‘McLintock’, amás de dellos documentales y rotulaciones al asturianu de cine mudu. Un llabor que ta teniendo muncha aceptación ente’l públicu asturianu y que nun escaez a la fastera occidental del país, yá que Popeye’l marín tamién va falar en gallego-asturianu nel DVD que va salir pronto a la venta.
 
Les persones que s’averen güei a Sotrondio van poder ver una cinta conformada por trés curtiometraxes, adaptaciones de ‘Les mil y una nueches’, producíos en Technicolor por Max Fleischer, tamién responsable de ‘Los viaxes de Gulliver’. Éstos son ‘Popeye the Sailor Meets Sindbad the Sailor (Popeye’l marín alcuéntrase con Simbad el marín)’, del 1936; ‘Popeye the Sailor meets Ali Baba’s Forty Thieves (Popeye’l marín alcuéntrase con Ali Baba y los Cuartenta Lladrones)’, del 1937; y ‘Aladdin and his wonderful lamp (Aladdin y la so llámpara maravillosa)’ (1939), con voces doblaes por Lara Herrero, Norberto Sánchez, Alberto Álvarez Peña, Carlos González y Antón Caamaño.
 
Otra manera, el Ciclu de Cine n’Asturianu, actividá entamada pola Conceyalía de Cultura de Samartín del Rei Aurelio al traviés de la Oficina de Normalización Llingüística, va continuar el xueves qu’entra, 1 d’avientu, cola proyeición de ‘McLintock’. Va ser a les 19 hores na Casona del Bravial, en Blimea.

Contador Estadistiques