Éstos son los siete puntos d'alcuerdu ente l'ALLA y el Partido Popular

Xosé Antón González Riaño y Álvaro Queipo presentaron de manera conxunta les coincidencies de la institución y el partíu na cuestión llingüística depués d'un alcuentru.

L'Academia de la Llingua Asturiana (ALLA), representada pol so presidente Xosé Antón González Riaño y pol secretariu Xosé Ramón Iglesias Cueva, y el Partido Popular (PP), pol presidente y diputáu Álvaro Queipo y polos tamién parllamentarios José Luis Costillas y Beatriz Polledo, celebraron un alcuentru históricu esta mañana por ser la primer visita d'un máximu mandatariu de la formación política a la sede académica. D'ella surdieron siete puntos d'alcuerdu que los sos responsables fixeron públicos depués nuna rueda de prensa.

Son los siguientes:

1. La llingua y la cultura asturianes tienen que tar al marxe d’ideoloxíes y opciones polítiques concretes, considerándoles una cuestión tresversal.
2. L’asturianu y l’eonaviegu son un bien social que contribuye a la vertebración de la sociedá asturiana.
3. Dientro de les aiciones de la política llingüística, ha garantizase la llibertá personal nel usu ensin restricción de les llingües propies.
4. L’Academia de la Llingua Asturiana ye’l referente común pa toa institución, organismu o ciudadanu no tocante a la cuestión llingüística nes sos derivaes científica, normativizadora y normalizadora.
5. La política llingüística deriva non d’una voluntá particularista, sinón d’un marcu llexislativu que se tien de cumplir, onde la referencia máxima ye la Constitución Española, xunto a otres como l’Estatutu d’Autonomía, la Llei d’usu, la Carta europea de les llingües minoritaries y los decretos de los currículos educativos.
6. Les modificaciones, adautaciones o meyores plantegaes en rellación cola política llingüística habríen facese col máximu consensu parllamentariu en representación de los asturianos y les asturianes.
7. L’Academia de la Llingua Asturiana y el Partíu Popular apáutense en siguir caltiendo xuntes y contautos periódicos col envís de siguir afondando nos alcuerdos y postures compartíes.

Na semeya, González Riaño y Queipo conversen depués de la rueda de prensa.