Éstos son los planes de la Conseyería de Cultura

Política Llingüística, que se va dotar d’un Conseyu Asesor, va trabayar pa llograr la especialidá docente d’asturianu.

La Conseyera de Cultura, Política Llingüística y Turismu, Berta Piñán, compareció ayeri na Xunta Xeneral pa esponer les llinies polítiques principales de la so conseyería pa esta llexislatura. Destacó la relevancia que’l Gobiernu asturianu quier dar a la Política Llingüística esta llexislatura y anunció que’l so departamentu va ser especialmente activu “pa trabayar nuna propuesta de modelu d’oficialidá realista, d’alcuerdu cola situación sociollingüística asturiana, y construyíu sobre’l consensu”.

Anunció la puesta en marcha nos meses vinientes del Conseyu Asesor de Política Llingüística, cola pretensión de que seya representativu de la sociedá asturiana, y aseguró que se van crear comisiones permanentes conxuntes cola conseyería d’Educación y la de Ciencia, Universidá y Innovación. La Direición Xeneral de Política Llingüística va trabayar cola Xunta Asesora de Toponimia pa completar esta llexislatura l’estudiu y la revisión de la toponimia tradicional, y p’avanzar nel so usu alministrativu y na so difusión cartográfica.

Amás, la conseyería quier completar los procesos de normalización dixital y la implantación de traductores, buscadores y ferramientes qu’asitien l’asturianu nel universu de la rede. Nel mesmu capítulu, Piñán afirmó que se va trabayar pa llograr la especialidá docente pal asturianu y el gallego-asturiano.

Ampliación del Belles Artes

La docente manifestó'l compromisu del Gobiernu d’acometer a lo llargo d’esta llexislatura l’ampliación del Muséu de Belles Artes y anunció una mayor coordinación ente esta institución, la Llaboral Centru d’Arte, el Centru Niemeyer y el Muséu Barjola, pa “adaptar les sos funciones a la realidá artística asturiana”. La promoción cultural ye otru de los oxetivos de la conseyería, asina, con esi propósitu, tien previsto llevar alantre una partida de planes por árees qu’incluyan la collaboración d’axentes privaos y la busca activa de patrocinios esternos.

Amás, anunció un proyectu de modernización de les biblioteques públiques y un pactu social pola llectura qu’incorpore alministraciones y industries culturales. Al respective del teatru, va ellaborar un plan específicu que recupere l’espíritu del Circuitu de les Artes Escéniques y abrió la puerta a la collaboración de los profesionales.

La de Cañu tamién se propón recuperar dende la conseyería’l circuitu d’artes plástiques y impulsar la producción cinematográfica, sofitando a les y los creadores y ampliando los espacios d’esposición pública.

Patrimoniu

La conseyera anunció que se van desenvolver dos de los documentos estratéxicos más relevantes nel caltenimientu y difusión del patrimoniu asturianu. Per una parte, van reactivase les midíes del Llibru Blancu del Camín de Santiago, cola vista puesta nel Añu Xacobéu del 2021, y, per otru llau, va ellaborase un plan de xestión pa implementar les llinies marcaes pol Llibru Blancu del Prerrománicu.

Yá tocante al patrimoniu etnográficu, aseguró que se ta trabayando nun plan de protección d’horros y paneres y nuna solución específica pa la defensa de los teitos. Piñán aprovechó la comparecencia pa informar de que Patrimoniu dio cursu al informe del Ministeriu de Fomentu relativu a El Chao Samartín, en Grandas de Salime, “lo que va suponer un impulsu definitivu a los trabayos nesti xacimientu de tanta relevancia”.

Venceyar deporte y desarrollu rural

Na so intervención Piñán tamién se refirió a la política deportiva. Nesti apartáu, la conseyería va defender y potenciar valores como la igualdá de xéneru, la integración, la cooperación y el xuegu llimpiu, nun proyeutu nel que se va trabayar en collaboración con Salú y Educación.

Una de les prioridaes va ser l’aprobación del proyectu de la Llei d’Actividá Física y Deporte, un marcu normativu nuevu que promueve los valores sociales, educativos, formativos, de salú y de solidaridá y integración na sociedá. Cultura entiende’l deporte como un sector emerxente pa fomentar el desenvolvimientu rural, polo que la conseyera anunció que va potenciar el turismu deportivu en zones afectaes pol despoblamientu cola organización d’actividaes y programes específicos.

Promoción turística

Tocante a Turismu, la escritora detalló los principios xenerales sobre los que van pivotar les iniciatives nesta competencia: sostenibilidá, desestacionalización, equilibriu ente territorios, urbanos y rurales, costeros o interiores, y la internacionalización de les marques. Afirmó que se va fomentar la collaboración coles alministraciones locales y van aumentase les llinies d’ayudes a pymes turístiques pa encarar la modernización y remodelación de los establecimientos, especialmente na dixitalización y nos aspectos teunolóxicos, de comercialización y d’eficiencia enerxética.

Nun horizonte más ampliu, y alliniáu cola estratexa de Turismo España 2030, afirmó que’l sector va reforzase con un programa basáu na sostenibilidá y na implementación de la intelixencia turística y la dixitalización. La conseyería va promover una gran alianza con tolos axentes implicaos nel sector, basada na participación y la cooperación.