Ésti ye'l programa de les xornaes de Grana

|
Asociación Grana presentación

L'asociación n'alcordanza de Yolanda González Huergo entama en payares charres y alderiques alredor del tema ‘(Sobre)vivir n’Asturies. Presente y futuru del territoriu y la so población’.

Les xornaes monográfiques van celebrase la tarde del vienres 4 de payares y la mañana del sábadu 5 cola presencia de seis espertos de disciplines diverses de dientro y fuera del país. Éstos van tratar “la forma y repartu de los recursos n’Asturies, la ordenación del territoriu y la evolución del repartu poblacional”, cola intención de "valorar, nun espaciu de debate y reflexón, cómo los planes y los debates actuales sobre los desarrollos urbanísticos, la evolución demográfica, el despoblamientu de les ales y los planes de desenvolvimientu económicu van condicionar el futuru d’Asturies".

La conferencia inaugural va correr a cargu d'Ícaro Obeso, profesor del Departamentu de Xeografía de la Universidá d’Uviéu, baxo'l nome 'Un casino en plena selva. La ordenación del territoriu n’Asturies'. Yá de sábadu, va entamase dos eventos, el primeru un formatu entituáu 'Conversaciones con...' nel que l'arquiteuta urbanista Laura López va dirixir un coloquiu con Sebastiá Jornet, arquitectu urbanista en Jornet Llop Pastor y profesor del Departamentu d’Urbanismu y Ordenación del Territoriu de la Escuela Técnica Superior d’Arquitectura de Barcelona, baxo'l títulu 'Territorio: asignaturas pendientes'.

Va completar les xornaes la mesa redonda 'Visiones d’Asturies', na que van intervenir Manuel Maurín, profesor del Departamentu de Xeografía de la Universidá d’Uviéu; Mariana Borissova Boneva, arquiteuta urbanista n'Urbania 2003 y vocal d'Urbanismu del Colegio Oficial de Arquitectos de Asturias; Francisco José Llera Ramo, caderalgu de Ciencia Política de la Universidad del País Vasco/Euskal Herriko Unibertsitatea (UPV-EHU) y direutor del Euskobarómetro; y Ignaciu Llope, psiquiatra y miembru de la Fundación Belenos.

Na semeya, miembros de Grana.

 

 

Contador Estadistiques