Esti xueves va presentase en Madrid l’actualización de la guía ‘Comer entre asturianos’

La guía ‘Comer entre asturianos’ acaba d’actualizase cola incorporación de chigres nuevos onde poder disfrutar de la cocina del país en Madrid. Ésta va presentase esti xueves na Delegación del Gobiernu na comunidá madrilana.
 
El fechu de que los 5.000 exemplares de la edición primera escosáranse rápidu y l’ésitu del perfil de Facebook y de la páxina web que recueye a un centenar de chigres con sabor asturianu en Madrid, llevó a la empresa qu’impulsa la publicación, Impact5, y al Gobiernu d’Asturies a asoleyar una edición nueva ampliada. Una guía completa mui útil pa los munchos asturianos obligaos a emigrar a Madrid y que tienen morriña de la cocina del país.
 
La presentación de ‘Comer entre asturianos’ va celebrase mañana na Delegación del Gobiernu en Madrid (cai Santa Cruz de Marcenado, 2) a partir de les 20 hores nun actu presentáu por Luján Argüelles y nel que van tar presentes el conseyeru de Mediu Rural y Pesca, Aurelio Martín; Julio Rey, humorista gráficu conocíu pol so trabayu xunto José Gallego, ‘Gallego y Rey’; y el periodista gastronómicu Carlos Maribona.