Esti xueves piesllen les XXX Xornaes Internacionales d’Estudiu

La Falcultá de Filosofía y Lletres va vivir esti xueves’l pieslle de les XXX Xornaes Internacionales d’Estudiu, entamaes pola ALLA. Nella destaca la presencia d’Ana Isabel Boullón, María Dolores Gordón y de Stefan Rushtaller.
 
Tres dos xornaes intenses de ponencies, comunicaciones y alderiques, les Xornaes Internacionales d’Estudiu, llendaes nesta ocasión al estudiu de la onomástica y la toponimia pola celebración del Conceyu Internacional de Toponimia y Antroponimia Asturiana, lleguen al so fin. La profesora de la Universidade de Santiago de Compostela, Ana Isabel Boullón, va ser la encargada d’abrir les actividaes del día a les 16.30 hores con una ponencia sobre ‘Cuestiones de onomástica gallega y asturiana”, pa depués dar pasu a les comunicaciones d’Ana María Cano González (‘Más apellíos modernos vinientes de xenitivu’), Xuan Xosé Lajo Martínez (‘La formación y emplegu de los antropónimos en Senabria: nomes oficiales, oficiosos y nomatos’) y Clara Elena Prieto Entrialgo (‘Nomes comerciales del vinu, la sidra y la cerveza n’Asturies).
 
Completen la xornada cabera d’esta actividá entamada pola Academia de la Llingua Asturiana (ALLA) les intervenciones de la profesora de la Universidad de Sevilla, María Dolores Gordón Peral, cola ponencia ‘Huella de la presencia de asturianos y leoneses en Andalucía Occidental y la Baja Extremadura’, y del profesor de la Universidad Pablo de Olavide, tamién de Sevilla, Stefan Ruhstaller, que va falar de ‘Los primeros diccionarios etimológicos de nombre de lugar’. El pieslle del Conceyu ta previstu pa les 20 hores.