Esti martes celébrase un conceyu d’estudiantes pa entamar una plataforma universitaria nacionaliega

Xunta Estudiantil Asturiana ye’l nome de la plataforma d’estudiantes nacionaliega que ta dando los sos primeros pasos. Esti martes ta prevista la celebración d’un conceyu abiertu a tolos alumnos y alumnes de la Universidá d’Uviéu.

“Porque ye la hora de la construir un espaciu d'activismu mozu y estudiantil críticu, nacionaliegu, social, feminista, ecoloxista, soberanista, altermundista, antifascista... Porque ye la hora de la mocedá d'Asturies”, anuncien los promotores d’esta plataforma nes redes sociales, que llamen a participar a tolos alumnos y alumnes de la universidá asturiana. El conceyu va celebrase, a les 18 hores, na sala Rector Alas del Edificiu Históricu de la institución.

D’esta forma, esti grupu de mozos y moces pretende cubrir un espaciu hasta agora ermu y trabayar polos derechos de los estudiantes universitarios dende una visión asturiana dafechu.