“Esti manual permite tocar la cordión diatónica dende’l primer día”, asegura Expósito

El primer manual pa deprender la cordión diatónica asturiana yá ye una realidá. El so autor ye Xuan Nel Expósito, qu’al traviés de partitures, exercicios y un sistema númericu pa identificar les notes, ufre un métodu que “pemite tocar l’instrumentu dende’l primer día”.

Los 30 años d’esperiencia d’Expósito dando clase, anguaño na uvieína Escuela de Música Tradicional Asturiana Manolo Quirós, treslládense a esti llibru con cuarenta partitures de pieces tradicionales asturianes que vien acompañáu de dos CDs. “Ye una ferramienta global pa deprender a tocar la cordión diátonica”, resume’l músicu.

Ésti ta destináu a xente que s’anicia col instrumentu, tenga conocimientos de solféu o non, yá qu’Expósito emplega un sistema númericu pa identificar cada nota. D’esta forma, l’usuariu pue facer sonar la cordión diatónica “dende’l primer día” siguiendo los exercicios que marca’l manual.

Amás, los dos discos qu’acompañen el llibru permiten acompañar col instrumentu les melodíes de les cuarenta pieces tradicionales, interpretaes a mou d’exemplu nún d’ellos con un ritmu lentu pa facilitar el so deprendimientu y, nel otru, a ritmu d’interpretación.

300 curdionistes

La cordión diatónica trátase d’un instrumentu que se pue considerar modernu dientro de la tradición asturiana, que comparten munches tradiciones folclóriques nel mundu y que tamién tien presencia nel norte de Lleón y en dalgunes partes de Galicia. N’Asturies hai anguaño “ente 200 y 300 cordionistes”, cifra Expósito, con dalgunos nomes destacaos que ponen clase como David Varela, Javier Tejedor, Nel Sánchez o Rodrigo Joglar.

“La salú de la cordión diatónica ye bona”, apunta l’autor d’esti manual, qu’esplica que l’instrumentu “ye caru, con un costu de más de mil euros”, pero con alternatives pa la xente que quiera empezar con él como l’alquiler con compra o’l mercáu de segunda mano. La so dificultá, “como la de cualquier otru instrumentu; namái ye necesario dedicación”.

El manual que firma Expósito y edita b.Alto pretende ser el primer pasu pa la xente que se quiera averar a la cordión diatónica. El so preciu ye de 30 euros y la meyor manera de facese con él ye contautando col músicu de manera direuta o al traviés de les sos redes sociales.

La intención del uvieín, que tres años tocando con Felpeyu anguaño ta metíu nel so proyeutu cola bandina La Garrapiella col que pretende “revitalizar les bandines tradicionales dando-y un aire modernu”, ye asoleyar próximamente un segundu manual de perfeicionamientu siguiendo’l mesmu métodu que nésti d’iniciaciación.