"Esti Gobiernu nun tien problema dalgún col asturianu", afirma Fernández

El presidente del país fixo referencia breve al idioma na so intervención nel Alderique d'Orientación Política Xeneral. Avisó que nun va dir más allá del programa eleutoral.

"L'asturianu ye otru patrimoniu cultural importantísimu. Nun ye un restu, sinón un patrimoniu que queremos vivu. La so proteición y promoción ye un mandatu estatutariu desendolcáu nuna llei vixente que los socialistes asumimos nel nuesu programa", comenzó Javier Fernández, pa depués señala que'l Plan pilotu esperimental pal usu del asturianu como llingua vehicular en Primaria "que tanto molestó a les bancaes de la derecha, ye, amén de voluntariu, respetuoso con esi programa y col ordenamientu xurídicu".

Por último, afirmó que "esti Gobiernu nun tiene problema dalgún col asturianu nin col cumplimientu de les sos promeses eleutorales. Tendríalos si se desnaturalizase o intentase adulterar el so contratu públicu colos eleutores".

Otra manera, Fernández amosó la so disponibilidá a aceptar propuestes importantes pa Podemos y Izquierda Xunida (IX) de cara a sacar poder sacar alantre los presupuestos del 2018, como ye'l cambiu del modelu de les escuelas infantiles, "col oxetu d'avanzar hacia una rede pública", o la creación d'una xunidá anticorrupción.