Esti fin de selmana ye la 7ª edición de “Samartín del Pinchu”

Dende´l vienres 14 al domingu 16 ufiértense pinchos y tapes en 27 establecimientos hosteleros de Samartín del Rei Aurelio.

El conceyu de Samartín del Rei Aurelio otra vegada más quier ser el destín de cientos d´asturianos esta fin de selmana, ya que van tener un bon motivu pa dase una vuelta por esti conceyu mineru y facer fonda. El vienres 14 d´ochobre aniciase la sétima edición del concursu de pinchos y tapes del conceyu, nomáu SAMARTÍN DEL PINCHU. Por espaciu de tres xornaes 27 establecimientos hosteleros participantes ufiertarán unes prestoses creaciones culinaries al preciu únicu de dos euros y mediu. Pa pasar una mañana o una tarde prestosa faciendo ruta gastronómica por Sotrondio, Blimea y L´Entregu.

Esti concursu gastronómicu ta entamáu por ECOSAM, asociación d’empresarios y comerciantes del conceyu y lleva ya varios años algamando unes ventes penriba de los 10.000 pinchos. Amás ye ún eventu gastronómicu que utiliza l´asturianu como llingua vehicular na información del mesmu, tanto na cartelería como nos 3.000 gastromapes repartíos. Nesti sen, ECOSAM cunta col asesoramientu de la Oficina de Política Llingüística de Samartín del Rei Aurelio.

Pa facilitar el desplazamientu, la llocalización y l´información de los pinchos esistentes nos gastrobares, cafés y sidreríes participantes editáronse 3.000 “gastromapes”. Amás subióse tola información tantu a Facebook como l´apartáu de noticies de la web de ECOSAM, ónde ún pue descargase el propiu gastromapa en pdf.