Esti añu regala musica asturiana

Como informamos na sección de llingua, esti añu la conseyería nun quixo tirar pol mercáu de la cultura asturiana, y nun fizo la campaña "Regala n'asturianu".Dende la sección de música queremos facer una pequeña reflexón al rodiu d'esti tema, sobre too no que cinca al tema de la música asturiana. Ye interesante ver la que la razón que dan pa nun facer la campaña esti añu ye'l poco ésitu que tuvo l'añu pasáu; ye difícil pensar que con solo esa campaña, limitada en tiempu y difusión, pudieren iguar la situación de desconocimientu na que s'alcuentra buena parte de la cultura asturiana. Dende bien de sectores de la música asturiana pídise una política coherente y continuada nel tiempu, qu'adulces calistre na sociedá la idea de qu'esiste una cultura propia, y que ye una opción tantu o más valida que'l de propuestes culturales que nos arrodien.Por eso dende equí queremos que regaléis música asturiana, y pa ello convidámosvos a qu'entréis na nuestra tienda na rede onde podéis topar un catálogu bien grande de productos asturianos. Tamién queremos proponeos un pequeño concursu pal foru d'esta sección, namás que tenéis qu'adivinar quien son los músicos qu'apaecen na semeya d'esta noticia.