Éstes son les once propuestes del Gobiernu pa la reforma del Estatutu d'Autonomía

Los decretos-lleis, el reconocimientu espresu de la capitalidá d'Uviéu y la posibilidá de convocar eleiciones, amás de la yá conocida declaración d'oficialidá, son dalgunes d'elles.

El documentu que ta presentando'l Gobiernu a los grupos parllamentarios, entituláu 'Aspeutos esenciales de la reforma del Principáu d'Asturies', incorpora un total de once puntos. Son la base pa la negociación d'estos meses de cara a la reforma de la norma que va cumplir 40 años d'esistencia.

Resumimos agora les once propuestes:

1. Preámbulu nuevu: l'actual nun tien y, "ensin modificación de la posición constitucional de la comunidá, tará destináu a reforciar la nuesa institucionalidá y a dar razón de los cambios nos que se concrete la reforma".
2. Revisión completa y actualización: sistemática, rúbrica d'artículos, téunica normativa y supresión d'anacronismos: reordénase tol articuláu del Estatutu "pa que'l testu resultante de la reforma sía más harmónicu y coherente".
3. Capitalidá: reconocimientu espresu de la capitalidá d'Uviéu y sede de la Xunta Xeneral, la Presidencia y el Conseyu de Gobiernu.
4. Declaración de derechos y deberes de los ciudadanos y d'oxetivos de les polítiques públiques del Principáu d'Asturies: establecimientu de los grandes oxetivos "de les instituciones asturianes p'ameyorar les condiciones de vida de la ciudadanía".
5. Decretos-lleis: introduzse la posibilidá de que'l Conseyu de Gobiernu pueda aprobar disposiciones con rangu de llei pa situaciones d'urxencia.
6. Disolución anticipada de la Xunta Xeneral: les eleiciones podríen convocase en cualquier momentu pa un periodu de cuatro años.
7. Declaración d'oficialidá: del asturianu y del eo-naviego nel so ámbitu territorial, tomando como base l'artículu 5 del Estatutu d'Autonomía de Galicia.
8. Gobiernu en funciones: "concreción de la entrada del Gobiernu en funciones, al tiempu de celebración d'eleiciones y non de constitución de la Xunta".
9. Regulación d'un capítulu independiente dedicáu a la confianza, censura y, en xeneral, rellaciones Xunta Xeneral/Gobiernu del Principáu d'Asturies: anguaño tán mui difuminaes nel testu.
10. Competencies nueves: negociación pa la incoporación de competencies nueves tomando como referencia los estatutos nuevos d'otres autonomíes.
11. Alministración llocal: una referencia a la mesma nel testu y la so posterior regulación por llei.

Na semeya, el presidente Adrián Barbón preside la mesa de negociaciones xunto con, a la so derecha, la vocera parllamentaria del grupu socialista, Dolores Carcedo; el vicepresidente Juan Cofiño; y la secretaria d’Organización de la Federación Socialista Asturiana (FSA-PSOE) y diputada Gimena Llamedo. Imaxe, recortada, a partir de la orixinal d'Armando Álvarez.