Estaos Xuníos tampoco nun crea emplegu

Cayíes nes bolses énte les males estadístiques macroeconómiques. El mal datu del mercáu llaboral d'Estaos Uníos tiró peles bolses p'abaxo.

Xunta esto les duldes y l'entamu de les vacaciones ficieron una selmana con pocu volume de negociu nos mercaos. Dempués de la xuba de tipos de la Reserva Federal poniendo'l preciu de les perres al otru llau del Atlánticu nel 1,25% la comunidá inversora ye mui sensible a anuncies negatives.

Los Estaos Uníos nun tan treslladando'l so crecimientu económicu al mercáu llaboral colo que frena'l consumu y asina'l motor de la primer economía del mundu. Esi problema de crecer ensin crear puestos de trabayu ye'l mesmu que yá lleva tiempu afogando al Vieyu Continente. El datu de tasa de desemplegu nos Estaos Uníos foi del 5,6% y la creación d'emplegu de 112.000 nuevos puestos de trabayu cuando los economistes contaben con 250.000.

Asina la economía norteamercia nun ta na situación más afayadiza pa recuperar el camín del xorrecimientu económicu. Na Zona Euru'l datu estadísticu más señeru foron los precios de producción de mayu qu'algamaron una medra del 0,6%.

Wall Street tuvo un mal fin bursátil con cayíes nos principales índices. Asina l'índiz Dow Jones cayó hasta los 10.282,83 puntos ( -0,50%). El tecnolóxicu Nasdaq tamién tuvo un pieslle en negativo con una cayida del 0,44% hasta los 2.006,66 puntos. Esti llunes los mercaos financieros y los bancos americanos piesllen por ser el Día de la Independencia.

Nel Vieyu Continente los valores y mercaos nun pintaron meyor. Les cayíes más abultaes foron n'Alemaña y Francia con perdes penriba'l 1%.

Otru tanto nel Ibex-35 dempués de siete selmanes en positivo. Les males anuncies tiraron p'abaxo de la Bolsa de Madrid. El selectivu Ibex-35 algamó los 8.034,60 puntos con una cayida selmanal del -1,06%. El volume de negociu del vienres foi de 3.500 millones d'euros. Los movimientos más importantes nel parqué madrilanu vinieron del repartu de dividendos de la mayoría de les empreses cotizaes.

Ente los valores con más perdes destaquen Gamesa, Amadeus, Bancu Sabadell, Abertis, Altadis y el Grupu Telefónica. Ente les xubes destacó sobremanera BBVA y tamién Zeltia y Metrovacesa. Los rumores de movimientos corporativos alrodiu'l BBVA tan ayudando a los especuladores a facer munchu negociu.

Xuba del preciu del petroleu gracies al consumu enerxéticu y les nueves amenaces terroristes.

El barril Brent asitiose penriba los 36 dólares barril lo que supón una medra de cerca del 3%. Otramiente, el metal mariello nun tien fuercia pa recuperar la cota de los 400 dólares onza pesllando nos 398,5.

D'otra manera, la divisa europea sigue afitando'l so valor respective al dólar. La moneda europea yá cotiza otra vegada más nos 1,23 dólares unidá. Sicasí foi la esperada xuba de tipos de la Reserva Federal l'anuncia más importante de la selmana pasada. Según el guión esperáu pola comunidá inversora Greenspan cumplió y entamó un nuevu periodu de xubes nos tipos d'interés. La próxima cita ye'l 10 d'Agostu cuando la Reserva Federal pueda dar anuncia d'otra xuba, anque nel mercáu de futuros de tipos ven mui improbable que de producise fuere de 50 puntos básicos. Mentanto na Zona Euru los analistes nun esperen que'l BCE entame a xubir tipos hasta finales d'esti añu o ya nos primeros meses del 2005.