Estaos Xuníos importa diecisiete variedaes asturianes de mazana

Viveros del país norteamericanu tienen yá delles a la venta tres recibir el preste del United States Department of Agriculture.

En total, esti departamentu aprobó la introducción nel so territoriu de 25 variedaes de mazana d'orixe estatal, de les que 17 son asturianes: Blanquina, Regona, Clara, Solarina, Collaos, Teórica, Coloradona, Verdialona, De la Riega, Xuanina, Panquerina, Ernestina, Perico, Prieta, Raxao, Limón Montés y Durona de Tresali. Hasta la fecha, Estaos Xuníos namái permitía la introducción pal cultivu de mazana europea procedente del Reinu Xuníu o Francia, anque entovía nun tán disponibles toles variedaes asturianes, yá que van entrando nel mercáu de forma progresiva tres pasar los controles gubernamentales.

Esta situación provocó la reaición de Podemos, que recuerda que'l Comprehensive Economic and Trade Agreement (CETA), aprobáu por Canadá y la Xunión Europeo pero entovía non en vigor al tar pendiente la so ratificación en tolos parllamentos europeos, llevará a que pueda vendese sidra fecho n'Estaos Xuníos como asturiana vía'l so vecín norteñu. "Ye un avisu pa les nueses producciones llocales, que nun pueden relaxase pese a la esistencia de una Denominación d'Orixe Protexida (DOP) de mazana de sidra asturiana, yá que esta certificación nun se ve amparada nel tratáu eurocanadiense de llibre comercio CETA que sofitaron nel Parllamento Européu'l PP, PSOE y Ciudadanos y qu'impedirá esixir un reconocimientu diferenciador a la sidra fecha n'Asturies. Frente a eso, la mesma bébora de mazana producida nos Estaos Xuníos llegará a la nuesa comunidá autónoma al traviés de Canadá ensin posibilidá d'identificar l'orixe", alerten dende la formación morada.

"Güei vemos peligrar la sidra, pero esti 'sírvase quién quiera' llegará principalmente al mercáu de la carne y los sos derivaos, y nengún otru productu podrá escapar a l'amenaza si a dalguna empresa multinacional resultaren-y d'interés el Quesu Cabrales, les fabes o el choscu de Tinéu, por exemplo; namái ye cuestión de que, como nel casu de la sidra, la so producción y comercialización lleguen a atrayer l'atención al otru llau del Atlánticu", añaden dende Podemos, que critica que'l Gobiernu "nun foi quien a incluyir" nengúna DOP asturiana "nel llistáu de DOP españoles aprobáu pal tratáu CETA".