Espublízase un estudiu sobre la historia, los usos y el repertoriu musical de la gaita asturiana

Eugenio Otero Vega, Fonsu Fernández García y Gausón Fernande Gutierri son los autores de ‘Cancioneru de la gaita asturiana’. Esti llibru ye un estudiu sobre la historia, los usos y el repertoriu musical d’esti instrumentu.

Son munches les obres que trataron sobre la gaita asturiana dende que, nel 1884, Fermín Canella destacara la necesidá d’estudiar esti instrumentu y que Xuacu Amieva, cien años depués, fixera col so ‘Método de gaita’ accesible al públicu un saber reserváu a los propios gaiteros. La mayor parte d’elles centrábense nel enseñu, ocupándose de forma principal n’aspeutos téunicos, como la descripción de les partes del instrumentu, la so afinación y el so mantenimientu, pero ‘Cancioneru de la gaita asturiana’ constitúi’l primer estudiu sistemáticu espublizáu n’Asturias sobre la  so historia, los sos usos y el so repertoriu musical.

“L’oxetivu del presente ‘Cancioneru de la gaita asturiana’ ye, per una parte, reunir y ordenar los materiales referíos pa ponelos a disposición del públicu interesao, sía escolar o aventayáu na interpretación d’esti instrumentu. Tamién ye la so intención situar la gaita na historia d’Asturies y poner de relieve cuál foi’l so significáu na nuesa sociedá tradicional, el so protagonismu na parte relixosa y profana de la fiesta y, en xeneral, la so presencia nos momentos más importantes de la vida de los asturianos como coleutivu”, espliquen los sos autores. La obra ta dividía en dos tomos: el primeru entituláu ‘Historia y usos de la gaita asturiana’, con munches ilustraciones, y el segundu, ‘Partitures’, con 334 melodíes tradicionales ordenaes pola so función na fiesta, esto ye, pieces de marcha, cantares, dances y bailles, y repertoriu relixosu.

‘Cancioneru de la gaita asturiana’ presentóse esta mañana nel salón d’actos del Muséu del Pueblu d’Asturies cola presencia de los trés coautores del llibru, y Xosé Nel Riesgo, direutor de la Fundación Municipal de Cultura, Educación y Universidá Popular. L’actu contó tamién cola intervención del gaiteru Jorge Suárez Carbajal, campeón nes modalidaes de gaiteru solista y pareya de gaita y tambor del Troféu de Gaites Noega nel 2012, acompañáu pola tamboritera Estefanía Moro Montequín, direutora de la Banda de Gaites de Llangréu y direutora de percusión de la Banda de Gaites Conceyu de Siero.